Ministri i Turizmit Blendi Klosi ka takuar ditën e sotme familjen e turistëve spanjollë që u dhunuan dje nga pronari i një lokali në Porto Palermo, Himarë.
Këtë lajm e ka bërë të ditur vetë ministri Klosi, me anë të një publikimi në rrjetet sociale.
Klosi shkruan se konflikti që përjetuan dje turistët, nuk është në traditën shqiptare të mikpritjes dhe as në kulturën tonë të trajtimit të miqve, dhe se një njeri i vetëm nuk përfaqëson Shqipërinë.
“Në mëngjes me familjen e pushuesve nga Spanja, që dje përjetuan një eksperiencë konflikti në Himarë, që nuk është as në traditën shqiptare të mikpritjes dhe as në kulturën tonë për trajtimin e miqve. Por siç e tha edhe përfaqësuesi i familjes Galdon, një njeri i vetëm nuk përfaqëson Shqipërinë, sikundër vlerësoi reagimin e menjëhershëm të autoriteteve dhe interesimin e drejtëpërdrejtë të qeverisë”, shkruan Klosi.
Madje në fotot e publikuara, duket se ministri i ka dhuruar dhe një tufë me lule zonjës së familjes.
Kujtojmë se ditën e djeshme 51-vjeçari Mihal Kokëdhima, pronar i restorantit “Panorama” në Porto Palermo të Himarës, u konfliktua me turistët spanjollë, pasi ata nuk pëlqyen ushqimin e servirur në restorant dhe i dhunoi në momentin që u larguan nga restoranti.
Sot policia njoftoi se Kokëdhima është arrestuar dhe rasti i është referuar Prokurorisë për hetime të mëtejshme.
