Sulmoi turistët spanjollë, në pranga 51 vjeçari Kokedhima

Policia ka arrestuar Mihal Kokedhima, 51-vjeçarin e dyshuar se një ditë më parë ka sulmuar një grup me turistë spanjollë.

“Ditën e djeshme, në lokalin e tij Bar-Restorant në Porto Palermo të Himarës, shtetasi M.K., për motive të dobëta ka kanosur me fjalë një grup turistësh spanjollë dhe më pas ka dëmtuar mjetin e transportit privat të tyre dhe është konfliktuar fizikisht me ta duke u shkaktuar dëme në trup por më shumë është dëmtuar shtetasja spanjolle K.R.”, thuhet në njoftimin e Policisë.

Incidenti është shënuar të enjten, ku sipas raportimeve, turistëve nuk i ka pëlqyer shërbimi në një lokal dhe kanë tentuar të largohen. Fugoni i tyre është ndjekur nga pronarët, të cilët kanë goditur me grushte turistët dhe drejtuesin e mjetit. Më pas, kanë nxjerrë armë të ftohta dhe kanë tentuar t’i godasin, duke thyer edhe xhamin e fugonit.