Rikthehet tmerri i zjarreve në Greqi, digjet nga flakët ishulli i njohur (FOTO)

Një zjarr i madh ka rënë sot në ishullin grek Elafonissos.

Mediat greke shkruajnë se në vendin e ngjarjes kanë shkuar mbi 20 zjarrfikëse dhe si është angazhuar dhe një helikopter për të vëzhguar situatën nga lart.

Zjarri ka rënë në një zonë të pyllëzuar dhe me shkurre ku era e fortë ka bërë që flakët të përhapen me shpejtësi.

Falë punës së shpejtë të zjarrfikësve zjarri është vënë nën kontroll megjithatë flakët vijojnë të shfaqen herë pas here.

Në lidhje me këtë ngjarje ka folur edhe Kryetari i Komunës Elafonissos, Efi Roumani, ku është shprehur se asnjë jetë njerëzore nuk është rrezikuar.

“Kampet dhe hotelet në Elafonissos u evakuuan për shkak të zjarrit” ka thënë një zëdhënës i policisë së zonës, nga ana tjetër.

Kujtojmë se korrikun e një viti më parë Greqia u përballë me një nga zjarret më shkatërrues që janë parë ndonjëherë në epokën bashkëkohore.

Nga flakët gjetën vdekjen 103 njerëz dhe gati 200 të tjerë u dërguan në spital me plagë. Ishte 23 korrik i vitit 2018 kur qyteti Mati, afër Athinës, për disa orë do të shkrumbohej nga zjarri. Të vdekurit mbushën rrugët. Shumë shtëpi dhe makina u dogjën. Mjaftë turistë dhe banorë të tmerruar gjetën si rrugë shpëtimi detin.