Festivali i ushqimit në Kaliforni nuk ka shkuar aspak ashtu si ishte planifikuar, pasi një person i pa identifikuar ende ka nisur të qëllojë me armë zjarri ndaj pjesëmarrësve.
Sipas autoriteteve si pasojë e plumbave tre persona janë vrarë dhe 12 të tjerë janë plagosur.
Këshilltari i qytetit Gilroy, Dion Bracco, ka thënë se këto të dhëna janë paraprake. Agjentët nga Byroja Federale, për alkool, duhan, të shtëna me armë zjarri dhe mjete shpërthyese kanë shkuar në skenën e incidentit, ka raportuar agjencia e lajmeve Associated Press.
Një dëshmitar i ka thënë televizionit NBC se sulmuesi ka qenë një person rreth 30 vjec.
Në një video të publikuar në rrjetet sociale shihen shumë njerëz të habitur dhe duke vrapuar për të gjetur ndonjë vend të sigurt.
I organizuar për herë të parë më 1979, Festivali i Hudhrës në Gilroy, ka qenë në përfundim të ditës së tretë dhe të fundit për këtë vit.
Ai njihet për akullore me hudhër, gara me ushqim dhe muzikë argëtuese.
Ky festival organizohet nga vullnetarë të komunitetit, të cilët mbledhin të holla për shkollat lokale, bamirësi dhe organizata joqeveritare.
