LIGJET E BIZNESIT
Që siguria ushqimore është në nivele të ulta në vendin tonë nuk ka nevojë për shumë teori. Mjafton një vizitë te dyqani apo marketi i lagjes së çdo shqiptari për ta kuptuar se sa të pasigurt jemi në atë që konsumojmë.
Por për ministrin e Bujqësisë Bledi Çuçi këto janë sulme të qëllime për një luftë tregtare. Në daljen e tij para medieve sot, numri një i bujqësisë shqiptare, (edhe pse pak gjëra e lidhin atë me bujqësinë, përveç karriges ministrore), preferoi të flasë për arritjet e mëdha që ky dikaster nën drejtimin e tij ka arritur.
Mollë në Indi, kos në Kinë, djath në SHBA, domate në Rusi. Gjithandej po shkojnë produktet shqiptare, sipas ministrit Çuçi. Për momentin vetëm në Australi nuk kemi mundur dot që të çojmë lesh delesh dhe as në Brazil nuk kemi gjetur mundësinë për të eksportuar banane.
Por përtej këtyre sukseseve globale që bujqësia shqiptare ka arritur në këto 6 muaj që Bledi Çuçi është ministër, në daljen për mediet, vetëm për pjeprin që shitet me përmbajtje të lartë nitrati në tregjet shqiptare nuk kishte përgjigje. Pyetjen e një gazetari se çfarë do të bëhet me këtë fenomen që në medie, por edhe vetë qytetarët kanë filluar ta konstatojnë se bostanet që marrin në markat, më shumë kanë nitrat se sa ujë, ministri nuk mundi t’i përgjigjej. Sikur të ishte vetëm kaq, një mungesë përgjigje do të ishte gjysma e së keqes.
Por ministri Çuçi i plotfuqishëm për shkak të sukseseve interkontinentale të bujqësisë shqiptare me parmendë, ironizoi me gazetarin, duke thënë: “Nuk është në mandatin e AKU-së të marri shalqinjtë dhe pjeprat, t’u vejë lodrën kineze që po u shiten shqiptareve si dëngla këto ditë për hir të luftërave të pandershme tregtare”.
Një përgjigje pa shumë klas, ose më mirë ta themi që nuk i shkon për shtat një ministri. Por gjithsesi po bëjmë sikur nuk e kemi dëgjuar, pasi edhe vapa mund të ketë ndikimin e saj në këtë sjellë të ministrit, por meqë ai e përmendi vetë, AKU-në, kjo çfarë pune bënë?
Pjepra me nitrat, frigoriferë të marketeve jashtë funksionit, perime me pesticide tej normave, këto togfjalësha kanë qenë strishat e televizioneve shqiptare në javën e fundit. Çfarë ka bërë AKU për të na ruajtur shëndetin që këto fenomene mos të na prekin?
