Bordi i Transparencës ka përcaktuar çmimet e reja të shitjes me pakicë dhe shumicë të karburanteve, të cilat hyjnë në fuqi këtë të enjte, më 19 nëntor, në orën 14:00.
Sipas vendimit të marrë në mbledhjen e radhës, çmimi i naftës (gazoilit) nuk do të jetë më shumë se 201 lekë për litër në shitje me pakicë, ndërsa për tregtimin me shumicë kufiri është vendosur në 189 lekë/litër. Ndërkohë, benzina do të tregtohet me një çmim maksimal prej 160 lekësh për litër në pakicë dhe 148 lekësh për litër në shumicë. Për gazin për automjete, çmimi maksimal është përcaktuar në 71 lekë/litër në pakicë dhe 59 lekë/litër në shumicë.
Një çmim i veçantë është vendosur edhe për gazoilin që përdoret në aktivitetin e peshkimit, i cili do të kushtojë 105 lekë për litër. Çmimet e reja do të mbeten në fuqi deri në mbledhjen e ardhshme të Bordit, kur do të rivlerësohet situata dhe do të pasqyrohen ndryshimet e mundshme në treg. Bordi u ka tërhequr vëmendjen operatorëve të tregtimit me shumicë dhe pakicë për zbatimin e vendimit, duke paralajmëruar se në rast konstatimi të shkeljeve do të vendoset pezullimi i aktivitetit. Vendimi është marrë në kuadër të masave për administrimin e situatës së veçantë në tregun e hidrokarbureve.







