Bashkimi Evropian u bën thirrje qytetarëve të përgatiten për situata të mundshme emergjente, duke siguruar rezerva ushqimore, ujë të pijshëm dhe medikamente për të paktën 72 orë. Udhëzimet e reja të Komisionit Evropian synojnë të rrisin nivelin e vetëpërgatitjes së familjeve përballë krizave të ndryshme, nga fatkeqësitë natyrore deri te kërcënimet e sigurisë. Sipas rekomandimeve, çdo familje duhet të ketë një çantë emergjence, një plan të qartë evakuimi dhe një mënyrë komunikimi mes anëtarëve të saj në rast se rrjetet telefonike ndërpriten. Në pajisjet e nevojshme përfshihen kutia e ndihmës së shpejtë, elektrik dore, bateri, radio, karikues portativë, para në dorë dhe dokumente të rëndësishme. Komisioni Evropian thekson se 72 orët e para janë vendimtare, pasi gjatë një krize shërbimet e emergjencës mund të mbingarkohen dhe të mos jenë në gjendje të ofrojnë ndihmë të menjëhershme për të gjithë qytetarët.
Përmbytjet, ndërprerjet e energjisë, sulmet kibernetike apo një konflikt i armatosur mund të shkaktojnë ndërprerje të furnizimit me energji elektrike, ujë, ngrohje, transport dhe komunikime. Situata të tilla mund të vështirësojnë gjithashtu kryerjen e pagesave elektronike, duke e bërë të domosdoshme mbajtjen e një sasie parash në dorë. Nisma është pjesë e Strategjisë së Bashkimit Evropian për Gatishmërinë, e prezantuar në mars të vitit 2025, e cila synon të ndryshojë qasjen e Evropës ndaj krizave, duke kaluar nga reagimi pas ndodhjes së tyre drejt parandalimit dhe përgatitjes paraprake. Ndër rreziqet e identifikuara përfshihen lufta e Rusisë në Ukrainë, sabotimi i infrastrukturës kritike, sulmet kibernetike, dezinformimi, përmbytjet, zjarret dhe ndërprerjet e mëdha të energjisë. Niveli i përgatitjes për emergjencat mbetet i ndryshëm mes vendeve anëtare. Disa shtete të Evropës Veriore kanë sisteme më të konsoliduara të mbrojtjes civile dhe menaxhimit të krizave, ndërsa vendet e Evropës Jugore kanë ende nevojë për përmirësime në këtë drejtim.






