LIGJET E BIZNESIT
Kuvendi ka miratuar ndryshime të rëndësishme në ligjin “Për tregtarët dhe shoqëritë tregtare”, duke vendosur rregulla më të forta për drejtimin e bizneseve, transparencën financiare dhe parandalimin e konfliktit të interesit. Një nga risitë kryesore është kufizimi i ushtrimit të funksioneve drejtuese për personat e dënuar me vendim të formës së prerë për vepra penale kundër pasurisë dhe në sferën ekonomike. Ndalimi mund të zgjasë deri në 5 vjet, ndërsa Qendra Kombëtare e Biznesit do të krijojë një regjistër të posaçëm për verifikimin e administratorëve dhe përfaqësuesve ligjorë.
Ndryshimet parashikojnë gjithashtu kontroll më të fortë mbi transaksionet me palët e lidhura. Për shoqëritë e listuara, transaksionet që kalojnë 1.5% të totalit të aseteve do të kërkojnë miratim paraprak dhe publikim të detajeve brenda 72 orëve. Rregulla të reja vendosen edhe për shpërndarjen e dividentit. Shoqëritë nuk do të mund të shpërndajnë fitime nëse kjo cenon kapitalin e regjistruar dhe rezervat e detyrueshme, ndërsa aksionarët që përfitojnë pagesa të paligjshme do të duhet t’i kthejnë ato. Një tjetër element është transparenca mbi pagat dhe shpërblimet e drejtuesve në shoqëritë e listuara. Politika e shpërblimit do të miratohet nga aksionarët të paktën çdo katër vjet, ndërsa raporti vjetor i pagave dhe bonuseve do të auditohet në mënyrë të pavarur.
Paketa zgjeron gjithashtu të drejtat e aksionarëve dhe investitorëve, si dhe prezanton konceptin e ndarjes së pjesshme të shoqërive, duke mundësuar transferimin e një pjese të aseteve dhe detyrimeve pa shpërbërjen e kompanisë. Ndërkohë, disa dispozita për ndërveprimin e regjistrave tregtarë me platformat evropiane do të hyjnë në fuqi me anëtarësimin e Shqipërisë në Bashkimin Evropian. Rregullat e reja në QKB do të zbatohen pas përditësimit të sistemeve informatike.
