LIGJET E BIZNESIT
Transporti i hidrokarbureve në Shqipëri do të monitorohet përmes një sistemi të ri elektronik, i cili synon të forcojë kontrollet doganore, të luftojë evazionin dhe kontrabandën, si dhe të mbrojë të ardhurat publike. Sistemi i Plumbçeve Elektronike (E-Seals) ka nisur zbatimin në Porto Romano, duke sjellë ndryshime në mënyrën e mbikëqyrjes së transportit të mallrave nën regjimin doganor të tranzitit. Ministri i Financave, Petrit Malaj, dhe Drejtori i Përgjithshëm i Doganave, Besmir Beja, zhvilluan një vizitë pune në Porto Romano, ku u njohën nga afër me funksionimin e teknologjisë së re.
Sistemi mundëson gjurmimin e autocisternave në kohë reale, nga momenti i nisjes deri në mbërritjen në pikën doganore të daljes. Përmes pajisjeve elektronike identifikohen automatikisht devijimet nga itinerari i përcaktuar, ndalesat e pazakonta apo tentativat për ndërhyrje në plumbçet e vendosura në mjetet e transportit.
Ministri Malaj theksoi se ky mekanizëm synon të lehtësojë procedurat për operatorët ekonomikë, ndërsa njëkohësisht rrit kontrollin e autoriteteve doganore mbi lëvizjen e hidrokarbureve. Sipas tij, sistemi sjell katër përfitime kryesore: mbrojtjen e të ardhurave publike, rritjen e eficiencës për bizneset, uljen e kostove operacionale të administratës doganore dhe forcimin e luftës kundër evazionit e kontrabandës. Ndërkohë, Drejtori i Përgjithshëm i Doganave, Besmir Beja, bëri të ditur se deri më tani transporti i hidrokarbureve në tranzit realizohej përmes shoqërimit fizik të autocisternave nga punonjësit doganorë. Kjo procedurë krijonte vonesa dhe grumbullime prej 30 deri në 40 autocisternash në terminal.
Me sistemin e ri, pas përfundimit të procedurave të plumbosjes, mjetet mund të nisen pa pritur krijimin e kolonave, ndërsa lëvizja e tyre monitorohet elektronikisht përgjatë gjithë itinerarit. Në këtë proces, një rol të rëndësishëm ka Salla e Monitorimit, e cila ndjek vendndodhjen, itinerarin dhe gjendjen e plumbçeve elektronike. Çdo devijim, ndalesë e pazakontë apo tentativë ndërhyrjeje gjeneron sinjalizime automatike, të cilat përdoren nga administrata doganore për vlerësimin e riskut dhe përcaktimin e kontrolleve të nevojshme. Gjatë fazës pilot, të zhvilluar nga 16 deri më 31 tetor, janë monitoruar gjithsej 581 udhëtime. Nisja e zbatimit të E-Seals është pjesë e procesit të modernizimit dhe digjitalizimit të administratës doganore, duke synuar kalimin gradual nga kontrollet tradicionale fizike drejt monitorimit inteligjent të mallrave në tranzit.
