LIGJET E BIZNESIT
Ministria e Ekonomisë dhe Inovacionit do të vërë në dispozicion 600 milionë lekë për mbështetjen e startup-eve gjatë vitit 2027, me synimin për të financuar rreth 170 përfitues. Në total, buxheti i institucionit për vitin e ardhshëm do të jetë 42 miliardë lekë, me fokus arsimin profesional, punësimin, sipërmarrjen dhe inovacionin.
Ministrja e Ekonomisë dhe Inovacionit, Delina Ibrahimaj, prezantoi në Komisionin për Ekonominë, Punësimin dhe Financat projektbuxhetin e vitit 2027, duke bërë të ditura fondet e parashikuara për programet kryesore. Një nga prioritetet mbetet arsimi profesional dhe përmirësimi i shërbimeve të punësimit, për të cilat janë planifikuar 8,9 miliardë lekë. Investimet në shkollat profesionale do të arrijnë në 1,22 miliardë lekë, nga të cilat 742 milionë lekë do të financohen nga buxheti i shtetit dhe 480 milionë lekë në bashkëpunim me KfW-në gjermane.
Ndër projektet kryesore janë investimet në shkollën “Pavarësia” në Vlorë, me 158 milionë lekë, shkollën e re “Karl Gega” në Tiranë, me mbi 114 milionë lekë, si dhe Shkollën Teknike të Korçës, me 87 milionë lekë. Ndërhyrje janë parashikuar edhe në Shkodër, Lushnjë, Kukës dhe Pogradec, ndërsa projekte të reja do të zhvillohen në Fier dhe Tiranë.
Për pajisjen e shkollave me laboratorë, makineri dhe mjete mësimore janë parashikuar 68,8 milionë lekë, me synimin për të forcuar formimin praktik dhe bashkëpunimin me biznesin përmes arsimit dual. Sa i përket mbështetjes së sipërmarrjes dhe inovacionit, fondi i parashikuar për vitin 2027 është 1,64 miliardë lekë. Përveç 600 milionë lekëve për startup-et, do të financohet edhe zgjerimi i modelit TUMO jashtë Tiranës, me 160,7 milionë lekë. Gjatë vitit 2026, në skemën e mbështetjes së startup-eve janë regjistruar 1 219 aplikime, nga të cilat janë financuar 163 biznese të reja dhe 42 produkte kanë arritur të dalin në treg.
Ndërkohë, për ndërmarrjet mikro, të vogla dhe të mesme është parashikuar një fond prej 100 milionë lekësh, që synon modernizimin e proceseve të prodhimit, përmirësimin e standardeve dhe certifikimin e produkteve. Në këtë skemë, gjatë vitit 2026 janë regjistruar 280 aplikime dhe janë shpallur përfituese 62 ndërmarrje. Një tjetër projekt i ri që do të nisë në vitin 2027 është Laboratori Kërkimor dhe Kantina Eksperimentale, në bashkëpunim me Universitetin Bujqësor të Tiranës, me një financim prej 25 milionë lekësh. Projekti synon të forcojë lidhjen mes kërkimit universitar, inovacionit dhe sektorit prodhues.
Në drejtim të nxitjes së investimeve dhe eksporteve janë parashikuar 124,9 milionë lekë. Objektivat përfshijnë zhvillimin e 140 takimeve me kompani me kapital të huaj, identifikimin e të paktën 70 investitorëve potencialë dhe organizimin e 18 aktiviteteve promovuese.
Projektbuxheti parashikon gjithashtu fonde për përafrimin e standardeve me Bashkimin Europian. Për vitin 2027 synohet adoptimi i 2 578 standardeve të tjera të harmonizuara, si dhe ofrimi i të paktën 43 mijë shërbimeve metrologjike. Ndërkohë, 100 milionë lekë do të financojnë vijimin e projektit për Lehtësimin e Tregtisë dhe Transportit në Ballkanin Perëndimor, në bashkëpunim me Bankën Botërore, ndërsa për Qendrën Kombëtare të Biznesit janë parashikuar 145,8 milionë lekë, me fokus modernizimin e Regjistrit Tregtar dhe përmirësimin e shërbimeve elektronike. Sipas ministres Ibrahimaj, investimet dhe reformat e parashikuara synojnë të rrisin konkurrueshmërinë e ekonomisë shqiptare, të përmirësojnë klimën e biznesit dhe të përgatisin sipërmarrjen për standardet e tregut europian.
