LIGJET E BIZNESIT
Qeveria propozon rregulla të reja për menaxhimin e mbetjeve të pajisjeve elektrike dhe elektronike, me synim mbrojtjen e mjedisit, uljen e ndotjes dhe rritjen e ripërdorimit e riciklimit. Projektvendimi i publikuar në Konsultime Publike, përcakton detyrime për bashkitë, prodhuesit dhe distributorët, si dhe objektiva kombëtarë për grumbullimin e pajisjeve të dala jashtë përdorimit. Sipas projektvendimit, brenda 3 viteve nga hyrja në fuqi e tij, njësitë e qeverisjes vendore duhet të përcaktojnë dhe miratojnë pika të posaçme grumbullimi. Ato duhet të jenë lehtësisht të aksesueshme dhe të shpërndara në mënyrë proporcionale me dendësinë e popullsisë. Bashkitë do të bashkëpunojnë gjithashtu me prodhuesit dhe distributorët për pranimin dhe transportin e mbetjeve, si dhe do të informojnë qytetarët për vendet dhe mënyrën e dorëzimit të tyre.
Një nga detyrimet kryesore lidhet me distributorët e pajisjeve elektrike dhe elektronike. Kur konsumatorët blejnë një pajisje të re, ata duhet të mund të dorëzojnë pa pagesë një pajisje të vjetër ekuivalente, të të njëjtit lloj dhe me të njëjtat funksione. Ndërsa dyqanet me sipërfaqe shitjeje mbi 400 metra katrorë do të pranojnë falas edhe pajisje elektronike shumë të vogla, pa qenë e nevojshme blerja e një pajisjeje të re.
Projektvendimi parashikon gjithashtu objektiva të detyrueshëm për grumbullimin e mbetjeve elektronike. Norma minimale kombëtare do të jetë të paktën 45% nga viti i tretë pas hyrjes në fuqi, ndërsa nga viti i shtatë do të arrijë në 65% të peshës mesatare të pajisjeve të vendosura në treg gjatë tre viteve pararendëse, ose alternativisht 85% të mbetjeve të gjeneruara në vend. Kostot e grumbullimit, transportit, trajtimit dhe riciklimit do të mbulohen nga prodhuesit, në përputhje me parimin e përgjegjësisë së zgjeruar të prodhuesit. Trajtimi duhet të kryhet nga subjekte të autorizuara, duke garantuar sigurinë mjedisore dhe largimin e komponentëve të rrezikshëm.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
