LIGJET E BIZNESIT
Agjencia Shtetërore e Kadastrës ka përcaktuar procedurat dhe dokumentacionin që duhet të paraqesin qytetarët për të përfituar falje të plotë ose të pjesshme të detyrimit për parcelën ndërtimore në rastet e ndërtimeve të legalizuara pa leje. Lehtësitë variojnë nga 20% deri në 100%, në varësi të kategorisë sociale dhe kushteve të pagesës. Qytetarët që kanë përfunduar procesin e legalizimit të ndërtimeve pa leje mund të përfitojnë lehtësi financiare në pagesën e parcelës ndërtimore, në bazë të statusit social dhe kritereve të përcaktuara në legjislacion. Sipas udhëzimit të botuar në Fletoren Zyrtare, falja e plotë e detyrimit parashikohet për poseduesit e ndërtimeve pa leje që kanë statusin e invalidit paraplegjik ose tetraplegjik, si dhe për personat me statusin e të verbrit. Për të përfituar nga përjashtimi, ata duhet të paraqesin pranë drejtorive vendore të Kadastrës vendimet përkatëse të komisioneve mjekësore.
Ulje 50% për disa kategori sociale
Një grup më i gjerë qytetarësh mund të përfitojë ulje prej 50% të detyrimit për parcelën ndërtimore. Në këtë kategori përfshihen poseduesit që kanë në familje persona me statusin e invalidit paraplegjik ose tetraplegjik, persona të verbër, si dhe rastet e përcaktuara për invalidët e punës dhe bashkëshortët e tyre.
Përfitues janë gjithashtu familjarët e dëshmorëve të atdheut, familjet njëprindërore me fëmijë në ngarkim dhe poseduesit që kanë mbushur moshën e pensionit, në përputhje me kushtet ligjore.
Ndërkohë, qytetarët që përfitojnë ndihmë ekonomike mund të përfitojnë reduktim prej 30% të detyrimit. Për këtë kategori kërkohet një vërtetim nga njësia e vetëqeverisjes vendore ku kanë vendbanimin.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
20% ulje nëse pagesa kryhet brenda 30 ditëve
Përveç lehtësive që lidhen me kategoritë sociale, udhëzimi parashikon edhe një zbritje prej 20% të detyrimit të mbetur, nëse pagesa kryhet brenda 30 ditëve nga marrja dijeni për njoftimin. Kjo ulje zbatohet pavarësisht funksionit të ndërtimit pa leje, sipas kushteve të përcaktuara në udhëzim.
Si kryhen aplikimi dhe pagesat?
Procedurat administrative do të zhvillohen përmes sistemeve elektronike. Formularët plotësohen në mënyrë digjitale, ndërsa faturat për arkëtim u dërgohen qytetarëve përmes portalit e-Albania ose, në rastet e parashikuara, nëpërmjet postës. Pagesat kryhen në llogaritë bankare të drejtorive vendore të Kadastrës. Pas konfirmimit të pagesës dhe rakordimit financiar, detyrimi konsiderohet i shlyer dhe qytetari mund të vijojë procedurat për regjistrimin e pasurisë.
Udhëzimi synon të qartësojë mënyrën e përfitimit të lehtësive financiare që parashikon legjislacioni në fuqi. Ai nuk përbën një falje të përgjithshme të detyrimeve për legalizimet, por përcakton kategoritë përfituese, dokumentacionin dhe procedurat që duhet të ndiqen nga qytetarët.
