LIGJET E BIZNESIT
Tregu i sigurimeve në Shqipëri po lëviz me ritme minimale. Të dhënat e fundit të Autoritetit të Mbikëqyrjes Financiare tregojnë se gjatë periudhës janar – shtator të këtij viti, primet e shkruara bruto arritën në rreth 20.57 miliardë lekë, me një rritje prej 1.94% krahasuar me të njëjtën periudhë të një viti më pare. Ndërsa dëmet e paguara bruto arritën në rreth 6.69 miliardë lekë, me një rritje prej 8.29%.
Paralelisht, numri i kontratave të lidhura dhe numri i dëmeve të paguara u rritën përkatësisht me 6.80% dhe 6.05%, duke vijuar konfirmimin për zgjerimin e aktivitetit të sigurimeve.
Struktura e tregut mbetet e ruajtur dhe e dominuar nga segmenti Jo-Jetë, i cili përbën 91.32% të totalit. Primet e shkruara bruto arritën në rreth 18.79 miliardë lekë, me rritje prej 1.53%, ndërsa dëmet e paguara bruto arritën në rreth 6.22 miliardë lekë, me rritje prej 9.99%.
Sigurimet e detyrueshme motorike mbeten portofoli dominues i tregut Jo-jetë, duke zënë 68.93% të tij, me prime të shkruara bruto që arritën në rreth 12.95 miliardë lekë, në rritje me 3.83%, dhe dëme të paguara bruto që arritën në rreth 4.40 miliardë lekë, në rritje me 10.56%. Ndërkohë, numri i kontratave dhe i dëmeve paraqitet relativisht i qëndrueshëm, me rritje të moderuara, respektivisht 3.98% dhe 4.54%.
Sigurimet vullnetare të Jo-Jetës paraqiten në rënie të lehtë në zhvillimin e tregut, me prime të shkruara bruto që arritën në rreth 5.84 miliardë lekë, me një rënie prej 3.22%, ku rritja në shumicën e klasave u kompensua nga rënia në sigurimet nga zjarri dhe forcat e natyrës dhe në dëmtimet e tjera në pronë. Dëmet e paguara bruto për sigurimet vullnetare arritën në rreth 1.82 miliardë lekë, me një rritje prej 8.66% kryesisht nga sigurimet ndaj zjarrit dhe forcave të natyrës.
Segmenti Jetë edhe pse ruan një peshë të vogël në treg, prej 8.67% të totalit, shfaq një ecuri pozitive. Primet e shkruara bruto në këtë segment arritën në rreth 1.78 miliardë lekë, me rritje prej 6.79%, ndërsa numri i kontratave u rrit me 6.74%. Sa i takon dëmeve, vlera e dëmeve të paguara bruto arriti në rreth 0.28 miliardë lekë, me një rritje prej 7.78%, shoqëruar me rritjen e ndjeshme të numrit të dëmeve të paguara, prej 23.99%.
Faktorët që ndikuan tregun e sigurimeve
Autoriteti I Mbikëqyrjes Financiare vlerëson se të dhënat e raportuara në mbyllje të periudhës Janar – Shtator 2026 si edhe ecuria e tyre vjetore, janë ndikuar nga disa faktorë specifikë. Së pari, në sigurimet motorike, vijon të vlerësohet si ndikim zbatimi i faktorit të riskut “Historiku i dëmeve”, parashikuar në Rregulloren nr. 156, datë 19.09.2024.
Ndër dy produktet e tjera të sigurimeve të detyrueshme motorike, sigurimi kufitar raporton rënie, si pasojë e lehtësimit të lëvizjes së autoveturave drejt vendeve kufitare, anëtare të CEFTA-s, ndërkohë që kartoni jeshil paraqitet thuajse i qëndrueshëm, me një rritje të lehtë të primeve pavarësisht një rënieje të lehtë të numrit të kontratave.
Referuar sigurimeve vullnetare, ecuria e primeve të shkruara bruto në këtë 9 mujor reflekton rritjen në klasat e aksidenteve dhe shëndetit, të kaskos së mjeteve tokësore dhe të garancive, e cila u kompensua kryesisht nga rënia në sigurimet nga zjarri dhe forcat e natyrës dhe në dëmtimet e tjera në pronë.
Edhe dinamika e dëmeve të paguara është përcaktuar nga portofoli MTPL dhe ai i sigurimeve nga zjarri dhe forcat e natyrës, duke sjellë një rritje të ndjeshme të dëmeve të paguara.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Në segmentin Jetë, zhvillimet e primeve ndikohen nga performanca e produkteve të lidhura me kreditimin, si edhe dinamika e kontratave në grup, teksa rritja e numrit të dëmeve të paguara raportohet kryesisht nga kontratat flexi plan .
“Referuar statistikave të muajve të fundit, vërehet se aktiviteti i dëmeve në përgjithësi është stabilizuar, duke ruajtur nivele të qëndrueshme si në vëllimin e pagesave të dëmeve, ashtu edhe në numrin e rasteve”, thekson AMF-ja.
