LIGJET E BIZNESIT
Agjencia Shtetërore e Kadastrës (ASHK) arkëtoi rreth 4.2 miliardë lekë, ose afërsisht 46 milionë euro, nga të ardhurat e lidhura me pronat gjatë vitit 2025. Sipas të dhënave zyrtare të institucionit, të ardhurat tejkaluan planin vjetor me rreth 1.46 miliardë lekë, duke arritur në 152% të objektivit të parashikuar.
Krahasuar me vitin 2024, të ardhurat e Kadastrës u rritën me rreth 1.1 miliardë lekë, ose afërsisht 35% në terma vjetorë. Regjistrimi i pronave vijon të jetë zëri kryesor në strukturën e të ardhurave të ASHK-së. Nga kjo kategori, ku përfshihen tarifat e shërbimeve kadastrale, kamatëvonesat dhe taksa 3% për kalimin e pronësisë, u arkëtuan rreth 3.6 miliardë lekë, kundrejt një plani prej 2.2 miliardë lekësh.
Edhe të ardhurat nga procesi i legalizimit rezultuan mbi objektivin e parashikuar. Për këtë kategori, që përfshin pagesat për parcelat ndërtimore, tarifat e shërbimit dhe penalitetet, u arkëtuan 675 milionë lekë, kundrejt planit prej 550 milionë lekësh. Realizimi arriti në rreth 123% të objektivit. Në të ardhurat e përgjithshme të institucionit, një kontribut dhanë edhe transferimi i parcelave ndërtimore, nga i cili u gjeneruan rreth 422 milionë lekë, si dhe të ardhurat e tjera, që arritën në 253 milionë lekë.
Lushnja dhe Lezha kryesojnë rritjen e të ardhurave
Në nivel vendor, disa drejtori kadastrale shënuan rritje të ndjeshme të të ardhurave krahasuar me vitin 2024.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sipas të dhënave të ASHK-së, Lushnja kryeson renditjen me një rritje prej 222%, e ndjekur nga Lezha me 191%. Rritje të konsiderueshme u regjistruan edhe në Dibër, Berat dhe Shkodër.Në grupin e drejtorive me performancë të lartë përfshihen gjithashtu Pogradeci, me rritje prej 159%, dhe Tirana Rurale 1, me 155%. Rritje u evidentuan edhe në zonat Kamëz–Vorë, Durrës–Kavajë–Krujë, Sarandë, Vlorë dhe Tiranë Rurale 2. Sipas Agjencisë Shtetërore të Kadastrës, rezultatet e vitit 2025 nuk shpjegohen vetëm nga ndryshimet e miratuara në tarifat e shërbimeve kadastrale gjatë vitit.
Institucioni vlerëson se në rritjen e të ardhurave kanë ndikuar edhe shtimi i volumit të shërbimeve të ofruara, përmirësimi i eficiencës operacionale dhe rritja e kërkesës për shërbime kadastrale. Të dhënat tregojnë se regjistrimi i pronave dhe shërbimet e lidhura me to mbeten burimi kryesor i të ardhurave të institucionit, ndërsa tejkalimi i planit vjetor reflekton një nivel më të lartë arkëtimesh se objektivi i përcaktuar për vitin 2025.
