Sa pyje ka Shqipëria? Ja çfarë ka ndodhur në vite me biodiversitetin

Teksa vendi përballet me rrezikun e zjarreve, për shkak të zjarrëvënieve të qëllimshme apo edhe temperaturave të larta, sipërfaqet me pyje nuk janë shtuar në Shqipëri. Të dhënat e fundit të Institutit të Statistikave tregojnë se në vitin 2025, fondi pyjor dhe kullosor i Shqipërisë shtrihet në një sipërfaqe prej 1.731.891 hektarësh, duke mbetur i pandryshuar, krahasuar me vitin 2024, dhe duke përfaqësuar 60,2 % të sipërfaqes së përgjithshme të vendit.

Sipas Bilancit Kadastral të Fondit Pyjor dhe Kullosor, 66,2 % e fondit është e zënë me pyje (1.146.723 ha); 25,9 % me kullota dhe livadhe (449.167 ha) dhe 7,9 % sipërfaqe me bimësi pyjore dhe joproduktive (136.001 ha).

Vëllimi i përgjithshëm i pyjeve në vitin 2025 arrin në 53.015.350 m³, prej të cilave 93,9 % përbëhen nga pyje publike dhe 6,1 % nga pyje private.

INSTAT-i raporton se në vitin 2025, rrjeti i zonave të mbrojtura në Shqipëri përbëhet nga 777 zona, me një sipërfaqe prej 625.551 hektarësh. Numri i zonave mbetet i pandryshuar, krahasuar me vitin 2024, ndërsa sipërfaqja totale u rrit me rreth 940 hektarë.