LIGJET E BIZNESIT
Janë më të arsimuara, por paguhen më pak se burrat për të njëjtën punë që bëjnë. Është ky realiteti i grave në Shqipëri, ku pabarazitë gjinore, pavarësisht zbutjes në vite, ende janë të dukshme. Sipas të dhënave të Institutit të Statistikave, në vitin akademik 2024-25, në arsimin e lartë u diplomuan 28.939 studentë, nga të cilët 65,3 % ishin vajza.
Por kjo dominancë në arsim, nuk reflektohet në tregun e punës, ku shumë vajza dhe gra nuk angazhohen, për shkak të detyrimeve familjare dhe kujdesit për familjen, në atë që konsiderohet punë e papaguar.
Sipas INSTAT-it, në vitin 2025, shkalla e pjesëmarrjes në forcat e punës për grupmoshën 15-64 vjeç ishte 82,7 % për burrat dhe 70,1 % për gratë. Shkalla e punësimit ishte përkatësisht 76,0 % dhe 62,7 %. “Ndër gratë e punësuara të moshës 15-64 vjeç, 55,2 % ishin të punësuara me pagë dhe 25,0 % punëtore pa pagesë në biznesin e familjes”, vlerëson INSTAT-i.
Sipas të dhënave, hendeku gjinor në paga ishte 4,6 %, nga 4,9 % në vitin 2024. Paga mesatare mujore bruto e grave ishte 4,6 % më e ulët se ajo e burrave.
Bujqësia zinte peshën më të madhe në punësimin e grave, me 38,4 %. Në tregti, transport, hoteleri, shërbime të biznesit dhe administrative punonin 24,1 % e grave të punësuara dhe 31,1 % e burrave të punësuar. Shkalla e papunësisë për grupmoshën 15-64 vjeç ishte 8,2 % për burrat dhe 10,6 % për gratë. Krahasuar me vitin 2024, ajo u ul me 0,7 pikë përqindjeje për burrat dhe u rrit me 0,6 pikë përqindjeje për gratë. Ndër personat ekonomikisht joaktivë të moshës 15 vjeç e lart, 15,1 % e grave dhe 0,7 % e burrave deklaruan përmbushjen e detyrave shtëpiake si statusin e tyre kryesor.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Gratë përbënin 55,3 % të punëkërkuesve të papunë të regjistruar. Sipas nivelit arsimor, 49,4 % e grave dhe 47,3 % e burrave punëkërkues të papunë kishin arsim të mesëm të ulët (9-vjeçar).
