LIGJET E BIZNESIT
Google sapo prezantoi një brez të ri syzesh me inteligjencë artificiale dhe këtë herë ideja duket shumë më afër realitetit sesa fantashkencës.
Syzet e reja vijnë me ekran të integruar në lente, përkthim në kohë reale, navigim përmes Google Maps, kamerë, muzikë dhe Gemini AI, asistentin inteligjent që aktivizohet përmes një butoni në pjesën anësore të syzeve.
Në praktikë, kjo do të thotë se përdoruesi mund të marrë informacion pa nxjerrë telefonin nga xhepi. Mund të ndjekë udhëzime në rrugë, të dëgjojë muzikë, të pyesë për objektet që ka përpara, apo të kuptojë një gjuhë të huaj direkt përmes syzeve.
Një nga demonstrimet më interesante ishte përkthimi live. Një person fliste frëngjisht, ndërsa syzet e shfaqnin përkthimin në anglisht në kohë reale, përpara syve të përdoruesit. Është një nga ato momente ku teknologjia nuk duket më thjesht si “gadget”, por si një mjet që mund të ndryshojë mënyrën si komunikojmë.
Edhe navigimi mund të marrë një formë tjetër. Në vend që të ecim me telefon në dorë, duke kontrolluar hartën çdo disa sekonda, udhëzimet mund të shfaqen direkt në fushën tonë të shikimit. Një ndryshim i vogël në sjellje, por potencialisht i madh në mënyrën si ndërveprojmë me qytetin.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Megjithatë, syzet nuk janë ende perfekte. Zëri nuk ishte plotësisht i qartë, ekrani kishte ende nevojë për përmirësim dhe autonomia e baterisë mbetet një pikëpyetje e madhe. Pra, jemi ende në fazën ku produkti të bën të thuash “wow”, por edhe “le të presim pak versionin tjetër”.
Ajo që është e qartë, megjithatë, është se gara për pajisjet e ardhshme inteligjente po bëhet gjithnjë e më serioze. Google, Meta dhe Apple po lëvizin drejt së njëjtës ide: një botë ku telefoni mund të mos jetë më pajisja kryesore mes nesh dhe teknologjisë.
Dhe ndoshta, pas disa vitesh, të flasësh me AI-n përmes syzeve nuk do të duket më si skenë nga Cyberpunk, por si gjëja më normale e ditës.
