LIGJET E BIZNESIT
Një tjetër koncesion denoncohet nga Partia Demokratike që këtë herë e akuzon qeverinë se ka shkelur ligjin dhe vendimin e gjykatave duke e dhënë me koncesion kontrollin e pompave që furnizojnë qytetarët me karburant.
Ish-deputeti i Partisë Demokratike Agron Shehaj tha se ky koncesion i heq arkës së shtetit 100 milionë euro për 20 vjet dhe ia jep ato klientëve të kryeministrit.
Sipas ish deputetit Agron Shehaj qeveria ka dhënë me koncesion kontrollin e pompave që furnizojnë qytetarët me karburant në kundërshtim me vendimin e datës 27 maj 2019 të Gjykatës Administrative të Tiranës e cila vendosi pezullimin e tenderit
“Gjykata ka anuluar tenderin sepse “kriteret e dokumentacionit të koncesionit janë në kundërshtim me ligjin në fuqi” dhe urdhëron ministrinë të “ndryshojë kriteret dhe të fillojë tenderin nga fillimi. Sot ky shërbim bëhet nga Drejtoria e Metrologjisë dhe sjell në arkat e shtetit rreth 5 milionë euro në vit. Me dhënien e këtij shërbimi në koncesion, nëse nuk ndryshon tarifa, kompania e përzgjedhur nga Rama do të përfitojë këtë shumë për 20 vitet e ardhshme. Praktikisht 100 milionë euro nuk do të shkojnë më në arkën e shtetit por në xhepat e Ramës dhe miqve te tij”.- thotë Shehaj ndër të tjera.
Sipas demokratit vlonjat koncesioni i heq arkës së shtetit 100 milionë euro për 20 vjet dhe ia jep ato klientëve të Edi Ramës dhe familjes së tij. Partia Demokratike bën të ditur se ky koncension dhe të gjithë të tjerët që janë në kundërshtim me ligjin do të anulohen në të ardhmen.
