LIGJET E BIZNESIT
Të dhënat më të fundit nga Eurostat tregojnë se gjatë vitit 2025, qiratë reale të banesave në Shqipëri kanë shënuar një rritje të vazhdueshme, duke reflektuar presion të shtuar mbi koston e jetesës për familjet shqiptare. Sipas Indeksit të Harmonizuar të Çmimeve të Konsumit (HICP), që mat qiratë aktuale të banesave duke marrë si përiudhë bazë vitin 2015-të, Shqipëria ka ndjekur një trajektore të qartë rritëse gjatë gjithë vitit.
Në janar të vitit 2025, indeksi i qirave për Shqipërinë ishte 115.56, ndërsa në nëntor arriti në 123.20. Kjo përkthehet në një rritje prej rreth 6.6% brenda një viti, pa asnjë muaj me rënie apo stabilizim real. Rritja ka qenë graduale, por konstante, çka tregon se shtrenjtimi i qirave nuk është episodik, por pjesë e një tendence strukturore.
Nga mesi i vitit, veçanërisht pas qershorit, ritmi i rritjes bëhet më i dukshëm. Në qershor, indeksi kalon pragun 120 pikë, ndërsa në muajt pasues vijon të rritet deri në fund të vitit. Ky zhvillim sugjeron se kërkesa për banesa me qira ka mbetur e lartë, ndërkohë që oferta nuk ka arritur ta balancojë tregun.
Në krahasim me vendet e Bashkimit Europian, Shqipëria regjistron një rritje më të shpejtë se mesatarja e BE-së, edhe pse nivelet absolute të indeksit mbeten më të ulëta se në disa vende të Europës Qendrore dhe Lindore, si Hungaria apo Serbia.
Të dhënat e Eurostat tregojnë gjithashtu se Shqipëria ndodhet në një grup vendesh të Ballkanit Perëndimor ku qiratë janë në rritje të qëndrueshme, ndonëse jo ekstreme si në rastin e Turqisë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Edhe nëse i referohemi shifrave të Instat, vemë re se përgjatë muajve të fundit grupi ku përfshihen qiratë ka patur kontributin dhe rritjen më të lartë të çmimeve./ Tv Scan
