Rritje ekonomike 3.4%, eksperti shpjegon pse nuk duhet të jemi optimistë

Eksperti i ekonomisë, Eduart Gjokutaj ka analizuar të dhënat e fundit të Institutit të Statistikave për rritjen ekonomike në masën rreth 3.4% në tremujorin e parë të këtij viti. Qendra studimore e taksave, ALTAX që drejtohet nga Gjokutaj ka publikuar raportin “Rritja ekonomike në tremujorin e parë 2025, një vazhdimësi me sfidat e një modeli të njëanshëm”, në të cilin analizohet gjendja aktuale e ekonomisë dhe pritshmëritë për të ardhmen.

“Megjithatë, pas shifrave pozitive fshihet një ekonomi e varur nga ndërtimi, shërbimet e konsumit dhe remitancat. Tendenca mbetet e njëjtë me vitin 2024. Mungesë diversifikimi, dobësi në sektorin prodhues dhe informalitet i lartë. Pavarësisht rritjes së pagave, baza prodhuese nuk po forcohet dhe mungon një shtysë e qartë drejt formalizimit dhe inovacionit”, thekson eksperti Gjokutaj në një postim në facebook, teksa shpërndan për publikun edhe raportin.

Gjokutaj rekomandon marrjen e disa masave për të ndihmuar ekonominë. “Duhen politika që nxisin bashkëpunimin ndërsektorial, mbështesin prodhimin vendas dhe orientojnë investimet në sektorë me vlerë të shtuar”, thekson ai.

Postimi i plotë:

Ekonomia shqiptare në T.1 2025: Një rritje numerike mbi një themel të brishtë

Të dhënat e tremujorit të parë 2025 tregojnë një rritje ekonomike prej 3.39%, ndërsa paga mesatare bruto mujore kap vlerën 82,210 lekë. Megjithatë, pas shifrave pozitive fshihet një ekonomi e varur nga ndërtimi, shërbimet e konsumit dhe remitancat.

Tendenca mbetet e njëjtë me vitin 2024.

Mungesë diversifikimi, dobësi në sektorin prodhues dhe informalitet i lartë. Pavarësisht rritjes së pagave, baza prodhuese nuk po forcohet dhe mungon një shtysë e qartë drejt formalizimit dhe inovacionit.

Brishtësia strukturore, nga mungesa e investimeve produktive, te dobësia institucionale dhe orientimi ekonomik drejt aktiviteteve të shpejta por jo afatgjata rrezikon që rritja të mos përkthehet në zhvillim të qëndrueshëm.

Qeveria ka rol organizator, jo vetëm financiar.

Duhen politika që nxisin bashkëpunimin ndërsektorial, mbështesin prodhimin vendas dhe orientojnë investimet në sektorë me vlerë të shtuar.