A po krijon vende pune ekonomia? Papunësia arrin në 8.7%, rënie thuajse e pëpërfillshme

Papunësia në vend ka shënuar një zbutje të lehtë këtë vit. Të dhënat e fundit të Institutit të Statistikave tregojnë se në tremujorin e parë të 2025-ës, shkalla e papunësisë për moshat mbi 15 vjec arriti në 8.7 për qind, duke pësuar një rënie me 0.1% kundrejt të njëjtës periudhë të një viti më parë.

Në tremujorin e parë të vitit 2025, shkalla zyrtare e papunësisë është 7,6 % për burrat dhe 9,8 % për gratë. Krahasuar me të njëjtin tremujor të vitit 2024, shkalla e papunësisë është rritur me 0,4 pikë përqindje për gratë, ndërsa është ulur me 0,6 pikë përqindje për burrat.

Ndërkohë papunësia është zbutur tek të rinjtë. Sipas të dhënave të INSTAT, shkalla e papunësisë për të rinjtë 15–29 vjeç është 17.9 % në tremujorin e parë të këtij viti. Krahasuar me të njëjtën periudhë të një viti më parë, ky tregues është ulur me 2,4 pikë përqindje dhe kundrejt tremujorit të katërt të vitit 2024 është ulur me 1,3 pikë përqindje.

Për grupmoshën 30–64 vjeç, shkalla e papunësisë është 7,5 %. Në terma vjetorë, ky tregues është rritur me 0,4 pikë përqindje, dhe krahasuar me tremujorin e katërt të vitit 2024 është rritur me 0,3 pikë përqindje.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Popullsia ekonomikisht jo-aktive

Në tremujorin e parë të vitit 2025, 17,2 % e popullsisë ekonomikisht joaktive në moshë pune (15–64 vjeç) është e angazhuar për të përmbushur detyrat shtëpiake, 12,3 % është në pension ose pension të parakohshëm, ndërsa 15,2 % është në paaftësi të përhershme për punë.

Gjithashtu, 2,5 % e popullsisë ekonomikisht joaktive në këtë grupmoshë deklaron se nuk po kërkon punë pasi beson se nuk ka punë të disponueshme, dhe për këtë arsye klasifikohet si të papunë të dekurajuar.

Të rinjtë e moshës 15-29 vjeç që deklaruan se janë nxënës/studentë ose në trajnim përbëjnë 72,7 % të të rinjve ekonomikisht jo-aktivë. Ndër të rinjtë e moshës 15-29 vjeç ekonomikisht jo-aktivë, 1,1 % klasifikohen si të papunë të dekurajuar. Në popullsinë e moshës 30-64 vjeç, ky grup përbën 15,0 % të popullsisë ekonomikisht jo-aktive të kësaj grup-moshe.