Frikë nga lufta? Danimarka rrit buxhetin e mbrojtjes me gati 7 miliardë euro

Danimarka do të rrisë buxhetin e saj të mbrojtjes me 50 miliardë krona (6.8 miliardë euro) këtë vit dhe vitin e ardhshëm për të adresuar mungesat serioze, kryesisht në sistemet e mbrojtjes raketore tokë-ajër.

Rritjen e buxhetit për mbrojtjen e njoftoi kryeministrja e vendit. “A duket bota e paqëndrueshme? Po. A ka ndonjë arsye për të besuar se kjo do të përfundojë së shpejti? Jo”, tha Mette Frederiksen në një konferencë për shtyp.

“Ka një mesazh për kreun e forcave të mbrojtjes: blini, blini, blini. Blini ato që mundeni, këtu dhe tani, për të kontribuar në një mbrojtje më të fortë dhe, rrjedhimisht, një pengesë më të fortë”, shtoi ajo.

Sipas Ministrisë së Jashtme, paratë shtesë do të përdoren për blerjen e sistemeve të mbrojtjes kundërajrore. Pas shumë vitesh shkurtimesh drastike në sektorin e mbrojtjes, Danimarka vitin e kaluar vendosi të investojë 190 miliardë dollarë shtesë për ushtrinë e saj.

“Sistemet e armëve mund të blihen pa pasur nevojë të nisin tenderët që zakonisht kërkojnë kohë. Nëse nuk mund të blejmë pajisjet më të mira, blini të dytën më të mirë. Vetëm një gjë ka rëndësi tani dhe ajo është shpejtësia”, tha Frederiksen.

Frederiksen tha të hënën se Rusia është bërë një kërcënim për të gjithë Evropën dhe i bëri thirrje çdo vendi të rrisë shpenzimet e mbrojtjes për të mbrojtur veten, duke rritur mbështetjen e saj për Ukrainën.