I vjen rradha Bashkimit Europian, Trump: Patjetër që do të vendosim tarifa

Pas Kinës, Meksikës dhe Kanadasë, Donald Trump shënjestron dhe Bashkimin Europian. Presidenti amerikan njoftoi se do të vendosë tarifa të rënda edhe ndaj bllokut me 27 vende anëtare, duke vijuar më tej luftën e tij tregtare.

“Patjetër që do të vendosim tarifat ndaj Bashkimit Europian. Mund ta konfirmoj këtë, sepse ata vërtet kanë përfituar dhe ne kemi një deficit mbi 300 miliardë dollarë. Ata nuk na i marrin makinat. Ata nuk i marrin produktet tona bujqësore. Ata nuk marrin pothuajse asgjë, dhe ne u marrim gjithçka prej tyre miliona makina, sasi të jashtëzakonshme ushqimesh dhe produkte bujqësore”, u shpreh Trump.

Liderët e Bashkimit Europian kanë njoftuar se do të përgjigjen shpejt në rast të vendosjes së tarifave nga çdo partner në mënyrë të njëanshme. Sakaq, Trump paralajmëroi edhe Mbretërinë e Bashkuar, por pati një qasje më të butë duke nënvizuar se beson që mund të arrihet një marrëveshje për shkëmbimet tregtare. Presidenti amerikan ka konfirmuar se që nga e marta, do të nisë zbatimi i tarifave të importit në kuotën 25 për qind për mallrat nga Kandaja dhe Meksika, si dhe 10 për qind për mallrat nga Kina.

“Kanadaja ka qenë shumë abuzive me Shtetet e Bashkuara për shumë vite. Ata nuk i lejojnë bankat tona. Kanadaja ka qenë shumë e ashpër për naftën, për energjinë. Ata nuk i lejojnë produktet tona bujqësore. Ata nuk lejojnë shumë gjëra të hyjnë, dhe ne lejojmë të hyjë gjithçka. Ka qenë një rrugë me një drejtim. Ne subvencionojmë Kanadanë me rreth 200 miliardë dollarë në vit, dhe për çfarë? Çfarë nxjerrim prej saj? Ne nuk marrim asgjë prej saj. Sa për Meksikën, ne kemi pasur bisedime shumë të mira me ta, dhe kjo është hakmarrje. Kjo është hakmarrje deri në një farë mase. Miliona njerëz erdhën në vendin tonë përmes Meksikës dhe Kanadasë, dhe ne nuk do ta lejojmë këtë”, deklaroi ai.

Kanadaja iu përgjigj tarifave me të njëjtën monedhë, me kryeministrin Justin Trudeau, që tha se do të vendosë një taksë tregtare prej 25 për qind ndaj mallrave amerikane. Gjithashtu edhe Meksika po ndërton një plan reagimi.