Administrata tatimore ka prezantuar planin strategjik 2024-2028 i cili synon ndërtimin e një “Administrate të zgjuar dhe moderne”.
Plani fokusohet në katër shtylla kryesore: Rritjen e efiçencës së mbledhjes së të ardhurave tatimore duke nxitur përmbushjen vullnetare; Modernizimin e sistemeve dhe proceseve të administratës tatimore; Progresin organizativ dhe zhvillimin e kapaciteteve njerëzor; Integrimin në BE dhe përafrimin me standardet europiane.
Sa i takon shtyllës së parë, synohet të ndërhyhet në gjurmimin e mashtrimeve tatimore, evidentimin e rasteve të konsumimit të elementëve të veprave penale dhe dërgimi i autorëve para organeve të Drejtësisë dhe/ose marrja e masave administrative përkatëse.
Ndër masat e tjera përmendet kontrolli tatimor i përqendruar tek tatimpaguesit, risqet dhe sektorët ekonomikë të cilët kanë gjeneruar humbje të konsiderueshme në buxhetin e shtetit; Zhvillimi i metodave të reja të analizimit të të dhënave në mënyrë elektronike gjatë kontrollit tatimor duke u mbeshtetur gjërësisht në të dhënat e fiskalizimit; Përmirësimi i kapaciteteve në kontrollin e produkteve me risk të lartë tatimor me qëllim verifikimin elektronik të të dhënave në zinxhirin e transaksioneve; Përdorimi i qasjes për parandalimin e mashtrimeve tatimore mbështetur në monitorimin dhe komunikimin e vazhdueshëm me tatimpaguesit, në mënyrë që të stimulojnë korrigjimin vullnetar dhe në kohë të sjelljes jo të rregullt; Përmirësimi i kapaciteteve për analizimin e deklarimeve të tatimpaguesve degë të shoqërive shumëkombëshe dhe gjithashtu mbajta në vëmendje e riskut të pastrimit të parave dhe financimit të terrorizmit; Zhvillimi i teknikave të reja të kontrollit tatimor për individët me të ardhura të larta, me qëllim përmirësimin e cilësisë dhe rritjen e efektivitetit të tyre.
Sa i takon shtyllës dy për modernizimin e proceseve të administratës tatimore, parashikohet të merren një sërë masash, që nga implementimi i deklaratave të reja të Tatimit në Burim dhe DIVA; Digjitalizimi i deklarimit të vendushtrimit të aktivitetit nga tatimpaguesi dhe pronësia e vendushtrimit të aktivitetit; automatizimi i proceseve të kontrollit tatimor si dhe reduktimi i kohës së miratimit të shumës për rimbursim.
Aktualisht mesatarja është 35 ditë synimi është 25 ditë. Shtylla e tretë dhe e katërt përqendrohen në masa konkrete që synojnë të fuqizojnë punonjësit e administratës tatimore si dhe përafrimin me legjislacionin e Bashkimit Evropian.
