LIGJET E BIZNESIT
Ndërtesat e reja dhe ato që do të rinovohen duhet të plotësojnë kërkesat minimale të performancës energjetike të vendosura nga qeveria për zvogëlimin e emetimit të gazeve serrë dhe mbështetjen në energjinë e rinovueshme.
Ministria e Infrastrukturës dhe Energjisë ka nxjerrë për konsultim publik projektligjin që synon reduktimin e emetimeve të gazeve serrë të shkaktuara nga stoku i ndërtesave në vendin tonë, një hap i rëndësishëm ky drejt arritjes së objektivave klimatike dhe nxitjes së qëndrueshmërisë në sektorin energjetik dhe atë të ndërtimit.
Në projektligj parashikohet vendosja e standardeve për performancën energjetike dhe direktiva që ndihmojnë në uljen e emetimeve të karbonit, duke kontribuar në luftën ndaj ndryshimeve klimatike. Përmirësimi i efiçencës energjetike në ndërtesa do të rezultojë në kursime të konsiderueshme energjie, duke ulur kostot për konsumatorët dhe duke zvogëluar varësinë nga burimet fosile.
