Shqiptarët vazhdojnë të sigurojnë makinat, që është e detyrueshme më ligj dhe më pak pronat dhe shëndetin. Të dhënat e fundit të Autoritetit të Mbikëqyrjes Financiare tregojnë se në 7 mujorin e këtij viti, të ardhurat nga primet e shkruara bruto të sigurimit kapën vlerën 14.1 milionë lekë, ose 7.58% më shumë se e njëjta periudhë e një viti më parë.
Tregu mbetet i orientuar tek sigurimet e Jo-Jetës, të cilat sollën 91.65% të vëllimit të përgjithshëm të primeve, ndërsa sigurimet e Jetës kanë 8.31% dhe risigurimi me 0.042% . Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 41.96% dhe primet e shkruara bruto të sigurimit të detyrueshëm zënë 58.04% të totalit të tregut.
Mungesa e besimit tek kompanitë e sigurimit, cmimet e larta, por edhe mungesa e kulturës së sigurimit janë arsyet që kushtëzojnë një situatë të tillë në tregun tonë të sigurimeve.
Sigurimi i Detyrueshëm Motorik
Primet e sigurimit të detyrueshëm motorik, gjatë periudhës janar – korrik 2024 arritën rreth 8,240 milionë lekë, ose 9.39% më shumë se në periudhën janar – korrik 2023.
Produkti MTPL e brendshme, në periudhën janar – korrik 2024, pati një rritje prej 11.21% të vëllimit të primeve të shkruara bruto. Kjo u shoqërua edhe me një rritje të numrit të kontratave prej 10.84% krahasuar me të njëjtën periudhë të një viti më parë.
Produkti Karton Jeshil në periudhën janar – korrik 2024 pati një rritje prej 1.86% të vëllimit të primeve të shkruara bruto. Kjo u shoqërua nga një rritje të numrit të kontratave prej 20.06% krahasuar me periudhën janar – korrik 2023.
Produkti Sigurim Kufitar, në periudhën janar – korrik 2024, pati një ulje 4.97% të vëllimit të primeve të shkruara bruto krahasuar me periudhën janar – korrik 2023. Edhe numri i kontratave u ul me 5.96%.
Sigurimi Vullnetar
Primet e sigurimit vullnetar, gjatë periudhës janar – korrik 2024 arritën rreth 5,958 milionë lekë, 5.17% më pak se në periudhën janar – korrik 2023. Numri i kontratave të sigurimit vullnetar u rrit me 4.10 % krahasuar me periudhën janar – korrik 2023.
Primet e sigurimit vullnetar të Jo-Jetës gjatë periudhës janar – korrik 2024, patën një rritje me 3.49% kundrejt muajit janar – korrik 2023.
Në portofolat e Pronës, Përgjegjësive, Garancive të cilat gjatë periudhës janar – korrik 2024 siguruan mbi 2,620 milionë lekë të ardhura në total, vendin e parë e zunë Zjarri dhe Dëmtime të Tjera në Pronë me rreth 72.68%, të pasuara nga sigurimi i Përgjegjësisë së Përgjithshme me 18.50% të totalit.
Në portofolin sigurimi nga Zjarri dhe Forcat e Natyrës, gjatë periudhës janar – korrik 2024, vihet re një rritje prej 3.27% e vëllimit të primeve të shkruara bruto të këtij portofoli dhe një rritje me 3.55% e numrit të kontratave të sigurimit, krahasuar me periudhën janar – korrik 2023.
Të ardhurat nga sigurimet e Aksidenteve dhe Shëndetit, gjatë periudhës janar – korrik 2024, arritën në rreth 914 milionë lekë, duke shënuar një rritje prej 2.82% në krahasim me periudhën janar – korrik 2023.
Primet nga sigurimet e Jetës gjatë periudhës janar – korrik 2024, arritën rreth 1,180 milionë lekë, ose 13.16% më shumë se në të njëjtën periudhë të një viti më parë.
Dëmet e Paguara Bruto
Pagesat e dëmeve gjatë periudhës janar – korrik 2024 u rriten me 21.50% krahasuar me janar – korrik 2023. Pjesa më e madhe e dëmeve të paguara bruto i përket sigurimit motorik me rreth 3,416 milionë lekë, apo 71.74% të totalit të dëmeve të paguara bruto.
