Energjia e prodhuar nga hidrocentralet privatë përbën shumicën e energjisë së prodhuar në vend. Për herë të parë, impiantët privatë kanë tejkaluar ata shtetërore të kaskadës së lumit Drin. Sipas të dhënave të Institutit të Statistikave, gjatë tremujorit të parë të vitit 2024, energjia elektrike në dispozicion u rrit me 3.3%. Prodhimi neto vendas i energjisë elektrike në këtë periudhë u ul me 11.1 %, duke arritur vlerën 2.478 GWh nga 2.787 GWh energji të prodhuar në tremujorin e parë të vitit 2023.
Ky prodhim u realizua nga hidrocentralet publike në masën 46,9 %, nga hidrocentralet private dhe koncensionare në masën 50,3 % dhe nga të tjerë prodhues (Fotovoltaik) në masën 2,8 % të prodhimit neto vendas të energjisë elektrike. Importi bruto i energjisë elektrike (energji në marrje), në tremujorin e parë të vitit 2024, arriti vlerën 535 GWh nga 246 GWh që ishte në të njëjtën periudhë të një viti më parë, duke shënuar kështu një rritje me 2,2 herë.
Eksporti bruto i energjisë elektrike (energji në dhënie) arriti vlerën 814 GWh nga 904 GWh, duke shënuar një rënie me 10.0%
INSTAT bën të ditur se hidrocentralet publike, në tremujorin e parë të këtij viti prodhuan 1.162 GWh nga 1.614 GWh të prodhuar në tremujorin e parë të vitit 2023, duke shënuar kështu një rënie të prodhimit me 28.1%.
Hidrocentralet private dhe koncensionare, prodhuan 1.246 GWh nga 1.156 GWh të prodhuar në të njëjtën periudhë të një viti më parë, duke shënuar një rritje të prodhimit të energjisë elektrike me 7.8%.
Shkëmbimi i energjisë elektrike (diferenca mes eksportit dhe importit bruto të energjisë), në tremujorin e parë të vitit 2024 është 279 GWh nga 658 GWh që ishte në tremujorin e parë të vitit të kaluar.
