Skemës së pensioneve i janë shtuar gjatë vitit 2023, 30.247 të moshuar. Të dhënat janë bërë publike nga Instituti i Sigurimeve Shoqërorë. Pjesa më e madhe e këtyre pensionistëve janë burra, më saktësisht rreth 17 mijë dhe 13 mijë janë femra.
Por sa është mesatarisht pensioni që iu është lidhur këtyre të moshuarve?
Niveli mesatar mujore e një pensionisti për gjininë mashkullore është 16.702 lekë në muaj, ndërsa masa mesatare mujore për gjininë femërore është 14.077 lekë në muaj. Për të dy gjinitë se bashku, pensioni mesatar llogaritet në 15.560 lekë në muaj, apo rreth 1/3 e pagës minimale në shkallë vendi.
Hendeku i përfitimeve midis meshkujve dhe femrave evidentohet ndër vite, gjë që lidhet drejtpërdrejt me hendekun e pagave midis dy gjinive. Duke qenë se pensioni llogaritet në bazë të kontributeve të derdhura mbi pagën, sa më e ulët të ketë qenë ajo, aq më e vogël është vlera e përfituar.
Nga ana tjetër, sa i takon numrit të pensioneve të mbyllura, rezulton se gjatë 2023-shit janë 13,727 pensionistë që kanë humbur jetën, duke bërë që numri real i shtesës të jetë 16.520 pensionistë.
Koha mesatare e “gëzimit” të pensionit është 21.1 vite. Aktualisht, mosha e daljes në pension për meshkujt është 65.2 vjeç, ndërsa për femrat 61.7 vjeç, ndërsa mosha mesatare për të dy gjinitë është 63.9 vjeç.
