Numri i bankomateve ka shënuar rekord gjatë vitit 2023. Të dhënat e Bankës së Shqipërisë tregojnë se vitin e kaluar, numri i ATM-ve u rrit me 8.2%. Në të gjithë vendin janë 925 bankomate, nga 855 që ishin në vitin 2022.
Përveç funksionit klasik të tërheqjes së parasë cash, ATM-të që po instalohen vitet e fundit, kryesisht ATM-të që vendosen në degët e bankave, ofrojnë edhe shërbimin e depozitimit të parave. Nëse do t’i analizojmë sipas funksionit shohim se rritjen më të lartë e kanë pasur ATM-të me funksion depozitim të parave cash. Në vitin 2023 numri i tyre u regjistrua në 370 me një rritje prej 21.3%.
Nga ana tjetër, të dhënat tregojnë se me rritje po ashtu paraqiten edhe ATM-të me funksion tërheqje dhe me funksion urdhër transfertash me 1.3% dhe 11.1% përkatësisht. Sipas të dhënave nga Banka e Shqipërisë, në fund të vitit 2023 numri i kartave bankare aktive arriti në 1.43 milionë, me një rritje me 4.6% krahasuar me një vit më parë.
