Nënkryetari i Partisë Demokratike Edi Paloka ka hedhur akuza të forta në drejtim të ish-funksionarëve të kësaj partie, duke u shprehur se ata kanë bashkëpunuar me Edi Ramën për përfitime personale.
I ftuar në emisionin “Dita Jonë” në A2 CNN, Paloka u pyet edhe për pakënaqësitë e figurave historike si Jozefina Topalli dhe Arben Imami, ku u shpreh se nuk i shihte dhe nuk i lexontë më dhe shtoi se ata e kishin dikur një emër por po e hedhin në plehra.
Më vonë, por pa përmendur emra, Paloka deklaroi se disa “funksionarë të PD-së kanë bashkëpunuar me Ramën që në 2013, për të pasur përfitime personale”.
I pyetur për emra të përveçëm, ai refuzon por sqaron se nuk e ka të paktën me Topallin, sepse ajo thjesht “e ka inatin me Bashën, kjo e bën të dali kundër partisë së saj”.
“Protesta e sotme dhe plani i Rames per dhune, ndoshta dhe viktima ne 30 qershor”
Për sa i përket protestës, Paloka zbuloi se ajo do të ketë si komponent kryesor “falënderimin për qytetarët shqiptarë që nuk ranë pre e farsës së 30 qershorit”, ku pritet që mbështetësit të dalin në protestë edhe me fëmijët e tyre, duke nënkuptuar një qasje paqësore të saj, edhe pse Paloka thotë që “nuk kemi thirrur ndonjëherë protesta të dhunshme. Kemi patur fishekzjarrë dhe elemente që mund të kujtojnë idenë e një proteste ndryshe, por kurrë thirrje për dhunë”.
Dhuna, për të, ishte ajo që dëshironte kryeministri Edi Rama në 30 qershor, madje për Palokën kreu i ekzekutivit kishte aktivizuar “banda të ndryshme në çdo qytet, si Hakmarrje për Drejtësi në Lushnje, për të shkaktuar dhunë dhe ndoshta viktima”.
Ky ka qenë shkaku që PD ka ndryshuar strategjinë saj për zgjedhjet. “Vendimi u mor orët e fundit, brenda PD-së” por pohon se fillimisht të paktën ai nuk ishte dakord me qasjen e lidershipit opozitar.
“Unë isha nga ata që donin të bllokoheshin fizikisht zgjedhjet. Sot kam një mendim ndryshe, por vetëm sepse qytetarët iu përgjigjen thirrjes për të mos votuar”, thotë Paloka, përndryshe sipas tij “do të ishim përballë vendosjes reale të diktaturës në Shqipëri, me një kryeministër që nuk pyet për askënd, as për ligjet që ka bërë vetë”.
Sipas nënkryetarit të PD-së, Rama është tashmë ”i refuzuari i madh, 80% e shqiptarëve, edhe brenda socialistëve, nuk e do”, dhe opozita në shifra është mazhorance absolute, por ndërkohë mendon që Rama “nuk të len të votosh”.
