LIGJET E BIZNESIT
Të ardhurat doganore arrijnë në 207 miliardë lekë në 10-mujorin e 2026 – Rritje me 7.6 miliardë lekë, pavarësisht efektit negativ të kursit të këmbimit
Administrata Doganore ka arkëtuar 207 miliardë lekë të ardhura gjatë periudhës janar-tetor 2026, duke shënuar një rritje prej 7.6 miliardë lekësh krahasuar me të njëjtën periudhë të vitit të kaluar.
Sipas të dhënave të publikuara nga Doganat, ky është 10-mujori me performancën më të mirë në historinë e administratës doganore shqiptare, me një rritje të të ardhurave që tejkalon edhe nivelin e rritjes ekonomike.
Megjithatë, rezultati është arritur pavarësisht ndikimit negativ të kursit të këmbimit, i cili ka reduktuar të ardhurat e arkëtuara me rreth 6.3 miliardë lekë.
Efekti është shkaktuar kryesisht nga zhvlerësimi i dollarit amerikan me 8.2% dhe i euros me 3.2%, duke ndikuar në vlerën e detyrimeve doganore të llogaritura në lekë.
Administrata Doganore thekson se mbetet e angazhuar për realizimin e planit të të ardhurave, si dhe për mbështetjen e tregtisë së hapur dhe të drejtë, në përputhje me politikat tregtare dhe zhvillimin e sektorëve të ndryshëm të ekonomisë.
Në fokus mbetet gjithashtu garantimi i sigurisë përgjatë gjithë zinxhirit tregtar dhe zbatimi i politikave që ndikojnë në lehtësimin dhe administrimin e tregtisë.
