LIGJET E BIZNESIT
Implementimi i teknologjisë 5G pritet të nisë këtë vit, bazuar në arkitekturën aktuale 4G. Në të njëjtën kohë synohet një korridor i përbashkët 5G me Kosovën. AKEP ka hedhur për konsultim dokumentin që parashikon teknologjinë e re, “Mbi dhënien e të drejtave të përdorimit të frekuencave të brezit 3400 – 3800 MHz”.
Sipas AKEP, bazuar në praktikat e ndjekura në vendet e BE-së për futjen e teknologjisë 5G në tregun e telefonisë mobile, implementimi fillestar i teknologjisë 5G në këtë brez frekuencash është mundësuar nga ripërdorimi i arkitekturës ekzisutese të teknologjisë 4G me implementimin Non-stand Alone (NSA). Ky brez frekuencash është caktuar kryesisht në shtetet Anëtare të BE-së dhe përfiton nga ekonomitë e mëdha të shkallës (duke qenë se është brezi kryesor 5G në mbarë botën).
Shpërndaja e duhur e këtij brezi frekuencash, pritet të ndikojë pozitivisht në konkurrencën midis operatorëve ekzistues në treg, pasi disponueshmëria e frekuencave të lira në këtë brez mund të inkurajojë futjen në tregun e telefonisë celulare edhe të operatorëve të rinj që mund të operojnë me teknologjinë 5G, apo të nxisi rritjen e kërkesave për akses dhe nga aktorë të tjerë.
Ky dokument sjell edhe Memorandumin e Bashkёpunimit mes Qeverisë së Shqipërisë dhe Qeverisë së Kosovës “Për krijimin e korridorit digjital 5G dhe lehtësimin e lëvizjes në të ardhmen”, nënshkruar në 2020.
Memorandumi parashikon edhe hartimin e politikave dhe programeve të zhvillimit të rrjeteve 5G, në përcaktimin e standardeve për rrjete të sigurta dhe lëvizshmërinë, bazuar në praktikat e mira të BE-së dhe angazhimet ndërkombëtare për rrjetet e pastra.
