Nga 1 janari, një pjesë e bizneseve të mëdha prodhuese do të kalojnë në tregun e liberalizuar të energjisë. Kjo do të thotë se do të kenë mundësi ta sigurojnë vetë energjinë, me çmimin e bursave. Por procesi do të bëhet gradual dhe i butë, me mbështetjen dhe garancinë e qeverisë. Kjo do të thotë se bizneset do të kenë një vit kohë për t’u përshtatur me procesin, duke qenë të garantuar në furnizimin me energji nga OSHEE gjatë kësaj periudhë.
Arben Shkodra, Sekretar i Përgjithshëm i Shoqatës së Prodhuesve shpjegon se do të bëhet kalimi i bizneseve në tregun e liberalizuar dhe si e ka pritur sipërmarrja këtë proces.
Ka një seri takimesh që po bëjmë me zv.kryeministren dhe ministrat e linjës në lidhje me fusha të ndryshme të ekonomisë, të cilat na krijojnë atë qasjen e duhur të dialogut publik-privat, që ka ndodhur gjatë 2023-it dhe ne jemi të sigurte, që do të vazhdojë edhe gjatë vitit 2024.
Në lidhje me energjinë elektrike, ne vijmë nga një krizë energjetike, nga një situatë e paprecedentë që ka nisur të relaksohet. Ne kemi çmime shumë të mira në bursat ndërkombëtare dhe mendohet se do të kemi 10 vite më të lagështa, më të mira përsa i përket situatës hidrike. Nga ana tjetër, po bëhen përpjekje maksimale që të lehtësohemi për të vendosur panelet diellore në çatitë industriale, që do të thotë edhe një lehtësim tjetër përsa i përket çmimit dhe kostove të prodhimit.
Dalja në tregun e lirë është një reformë e kërkuar nga Komuniteti i Energjisë dhe qeveria shqiptare e ka stopuara gjatë periudhës së krizës dhe tani do ta rimarrë. Kjo dalje po bëhet në mënyrë graduale dhe është për t’u admiruar kjo pjesë, pasi ne do të dalim në tregun e lirë, por jemi të mbështetur në këtë tregun e lirë për një vit. Derisa ne të krijojmë njohurinë e duhur, kulturën e duhur për të marrë energjinë nga tregu i liberalizuar, do të jemi të mbështetur me kontrata fikse për një vit nga furnizuesi me shumicë publik.
Nuk do të kemi kosto, do të vazhdojë çmimi i energjisë të jetë i njëjtë nga shërbimi publik. Ato operatorë që kanë mundësi ta ulin çmimin, janë të lirë të dalin në tregun e energjisë dhe ta blejnë. Pra, kanë mundësi zgjedhje dhe kanë garancinë që shteti është aty”, deklaron Shkodra.
