Eksportuesit kanë dhënë sërish alarmin për gjendjen e vështirë, ku ndodhen, të shkaktuar nga zhvlerësimi i fortë i euros. Sipas shoqatës Pro-Eksport Albania, humbjet përllogariten cdo muaj në 9 milionë euro. Sipas qëndrimit zyrtar të këtij grupimi biznesi, shumë biznese janë mbyllur dhe të tjerat kanë reduktuar linjat e prodhimit.
“Ne dita-ditës kemi një humbje në rreth 50 punonjës që largohen nga sistemi i punës në vendin tonë. Po humbasim konkurrueshmërinë tonë në krahasim me vendet ballkanike. Bizneset prodhuese të sektorit tashmë kanë filluar të reduktojnë linjat prodhuese e disa të tjerë kanë filluar mbylljen e bizneseve, pasi kostot deri në pritje të ndryshimit të situatës janë të larta dhe kjo ka çuar deri më sot që bizneset të rrisin borxhin që kanë me DPT-n dhe Bankat e nivelit të dytë”, bën me dije Shoqata Pro-Eksport Albania.
Instituti i Statistikave raporton për një rënie të vlerës së eksporteve me 47.4 milionë euro në 10 muaj, ndërsa shoqata thotë se humbjet janë edhe më të mëdha. Në një letër të drejtuar Ministrisë së Financave, por dhe Sipërmarrjes, përveç kërkesë për dialog, sektori thotë se duhet miratuar edhe paketa që mbështet manifakturën.
“Paketa manifakturë ka mbi 3 vite në sirtarët e Ministrisë së Financave, nuk ka asnjë lloj reagimi”.
“Ajo çfarë ne kemi llogaritur është 150 euro humbje për punonjës, ose 9 milionë euro humbje në muaj në sektor.”
Kursi i këmbimit, rritja e kostove, mungesa e theksuar likuiditeti, por dhe amortizimi i impianteve prodhuese janë ndër problematikat e sektorit i cili zë mbi 38% të eksporteve Made in Albania dhe ka mbi 75.000 të punësuar.
