Mes tymueseve dhe zjarrit në parlament, buxheti 2024 votohet në më pak se 5 minuta

Në më pak se 5 minuta është miratuar në parim në parlament buxheti i shtetit 2024, drafti më i rëndësishëm i financave publike.

Drejtuesja e Kuvendit, Lindita Nikolla, komunikoi rendin e ditës në mes protestave, zhurmave dhe tymuesve teksa opozita bënte thirrje për komisione hetimore.

Deputetët opozitarë erdhën sërish herët në sallën e seancave plenare, përmbysën karriget pranë foltores, ku ishin rreshtuar punonjës të sigurisë. Disa prej tyre ndezën tymuese pranë foltores dhe në tryezat e punës në përpjekje për të pamundësuar zhvillimin normal të seancës, ku mori pjesë edhe kryeministri Edi Rama.

Nikolla i kërko deputetëve opozitarë të merrnin pjesë në diskutimin e projekt-buxhetit të ri.

“Pse ju nuk doni të diskutoni për buxhetin? Pse ju nuk uleni të diskutoni për investimet dhe rritjen e pensioneve dhe pagave për punonjësit e shërbimeve publike?”, tha zonja Nikolla.

Pas thirrjeve në sallë nga disa deputetë të opozitës, ajo nisi procesin e votimit, ku buxheti i ri mori votat pro vetëm të deputetëve të majtë. I pranishëm në sallë, teksa votohej në kohë rekord projektligji më i rëndësishëm, ishte edhe kryeministri Edi Rama, i cili prej disa javësh kishte munguar në Kuvend.

Zyra e shtypit të Kuvendit me anë të një njoftimi të shkurtër të shpërndarë me Whatsap ka sqaruar se: “Të gjitha aktet ligjore në seancën e sotme plenare u votuan me 73 vota pro”.

Kjo është hera e parë që buxheti i shtetit miratohet në këto kushte dhe në kaq pak minuta, sic ka qenë hera e parë që diskutimi i tij në komisionet parlamentare u bë online vetëm nga deputetët e mazhorancës.