Inflacioni po ulet, pse Banka e Shqipërisë rriti normën bazë? Ja si e shpjegon drejtuesi i lartë i BSH

Në tetor inflacioni zbriti në 3.8%, duke dhënë sinjale për një stabilizim të çmimeve. Por Banka e Shqipërisë gjykon se presionet për shtrenjtimin e mëtejshëm ekzistojnë ende dhe nuk ka qartësi për situatën. Erald Themeli, Drejtor i Politikës Monetare në Bankën e Shqipërisë, ishte i ftuar në “A2 Business” të gazetares Aurora Sulce, ku shpjegoi se pse u rrit norma bazë e interesit javën e kaluar, në kushtet kur inflacioni po bie.

“Është e vërtet që inflacioni ka pasur një trend rënës gjatë vitit 2023, trend që vijoi në tetor me rënien e tij në nivelin 3.8%. Por politika jonë monetare është e nevojshme për kthimin e inflacionit në objektivin e 3%. Ndërhyrja që bëmë ishte e duhur, pasi konkluzionet e analizës së Bankës së Shqipërisë tregojnë se presionet e brendshme inflacioniste mbeten të larta. Kjo është evidente nëse shohim të dhënat e tregut të punës, të cilat shfaqin një rritje të shpejtë të punësimit dhe pagave. Presionet inflacioniste janë të larta, nuk janë ende konsistente për përmbushjen e objektivit”, shpjegon Themeli.

Ai vijoi më tej duke thënë se, çdo lëvizje e politikës monetare bëhet thjesht dhe ekskluzivisht në funksion të stabilitetit të çmimeve, i cili është një parakusht i nevojshëm për rritjen e qëndrueshme dhe afatgjatë, por edhe e mbron mirëqenien e shtresave të gjera sociale.