Inflacioni zbret në tetor në 3.8%, mbetet ende e lartë rritja e çmimeve tek ushqimet

“Zbutet” inflacioni. Të dhënat e fundit të Institutit të Statistikave tregojnë se në tetor, treguesi që dëshmon për rritjen e cmimeve arriti në 3.8%. Ndërkohë që në të njëjtën periudhë të një viti më parë, inflacioni ishte në rekordin e 8.3%. Ndërkohë që inflacioni i produkteve ushqimore ka arritur në këtë periudhë në 7.4%.

Grupet që ndikuan në inflacion

Krahasuar me muajin Tetor 2022, rritja më e madhe e çmimeve vërehet në grupin “Argëtim dhe kulturë” me 7,6 %, pasuar nga grupet “Ushqime dhe pije joalkoolike” me 7,4 %, “Mobilje, pajisje shtëpie dhe mirëmbajtje e shtëpisë” me 5,2 %, “Hotele, kafene dhe restorante” me 4,8 %, “Pije alkoolike dhe duhan” me 3,6 %, “Veshje dhe këpucë” me 3,2 %, “Shërbimi arsimor” dhe “Mallra dhe shërbime të ndryshme” me 2,9 % secili, “Qira, ujë, lëndë djegëse dhe energji” me 1,6 %, “Shëndeti” dhe “Komunikimi” me 1,1 % secili.

Nga ana tjetër, çmimet e grupit “Transporti” shënuan ulje me 8,3 %. Brenda grupit të ushqimeve çmimet e nëngrupit “zarzavate përfshirë patatet” u rritën me 23,4 %, pasuar nga nëngrupet “qumësht, djathë dhe vezë” me 8,4 %, “mish” me 7,9 %, “fruta” me 6,1 %, “peshk” me 4,5 %, “sheqer, recel, mjaltë, çokollata dhe mbëlsira” me 4,0 %, “bukë dhe drithra” me 1,2 %, etj. Ndryshimet mujore të grupeve kryesore: Krahasuar me muajin Shtator 2023, çmimet e grupit “Mobilje, pajisje shtëpie dhe mirëmbajtje e shtëpisë” u rritën me 0,6 %, pasuar nga “Veshje dhe këpucë” me 0,5 %, “Transporti” dhe “Shërbimi arsimor” u rritën me 0,3 % secili, “Pije alkoolike dhe duhan” dhe “Hotele, kafene dhe restorante” me 0,2 % secili.