LIGJET E BIZNESIT
Të marrësh një kredi në bankë tani është bërë shumë më e vështirë. Kjo pasi interesat janë rritur dhe procedurat janë shtuar dhe vështirësuar. Një ecuri të tillë të aktivitetit kreditues e ka konstatuar Banka e Shqipërisë në raportin e Stabilitetit Financiar për 6-mujorin e parë të këtij viti.
“Gjatë tremujorit të dytë të vitit bankat kanë shtrënguar kushtet dhe termat e përgjithshme mbi kreditë e reja për bizneset. Shtrëngimi ka ardhur në formën e rritjes së kërkesave mbi komisionet dhe marzhet veçanërisht për kreditë me rrezik më të lartë sesa niveli mesatar, si dhe nëpërmjet rritjes së vlerës së kërkuar të kolateralit dhe uljes së madhësisë së kredisë.
Sipas bankave, shtrëngimi i termave të kredidhënies për bizneset lidhet me rritjen e rrezikut të perceptuar dhe uljen e nivelit të tolerancës së bankave ndaj rrezikut. Nga ana tjetër, konkurrenca në sistemin bankar vlerësohet se ka ndikuar në kahun zbutës të kushteve dhe termave të kreditimit”, theksohet në raport.
Banka e Shqipërisë vlerëson se kërkesa e bizneseve për kredi gjatë gjysmës së parë të vitit është nxitur nga nevoja për likuiditet ose për të rifinancuar borxhin. Kërkesa është shfaqur disi më e dobët, në kushtet e ndikimeve prej rritjes së normave të interesit. “Bankat vlerësojnë që kërkesa për kredi nga biznesi i madh ka qenë më e fortë sesa kërkesa nga biznesi i vogël dhe i mesëm, ndërkohë që pritjet për kërkesën e përgjithshme për kredi nga sektori i biznesit mbeten optimiste për pjesën e mbetur të vitit”, thekson raporti.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
