Suficiti buxhetor i krijuar këtë vit ka shkaktuar mungesë lekësh në treg. E thënë ndryshe, qeveria ka rritur ndjeshëm të ardhurat, duke mbajtur në nivele relativisht të ulëta shpenzimet. Kjo ka rritur ndjeshëm suficitin buxhetor, përtej cdo parashikimi. Sipas të dhënave nga Ministria e Financave, suficiti për periudhën 8 – mujore të këtij viti rezultoi në rreth 47.8 miliardë lek nga rreth 14.3 miliardë lek në të njëjtën periudhë të një viti më parë dhe rreth 8 miliardë nga suficiti i planifikuar.
Rrjedhimisht, tregu ynë financiar ka përjetuar një mungesë të fortë lekësh në qarkullim, veçanërisht gjatë tremujorit të dytë të këtij viti. Kjo ka detyruar Bankën e Shqipërisë që të intensifikojë injektimet. Sipas të dhënave të bëra publike prej saj, mbi ndërhyrjet në tregun e parasë gjatë tremujorit të dytë të vitit 2023, Banka Qendrore sqaron se injektimi mesatar ditor nëpërmjet operacioneve injektuese të likuiditetit me maturim 1-13 javë është rritur në 45.41 miliardë lekë, kundrejt 34.89 miliardë lekësh në tremujorin e mëparshëm.
Por me gjithë rritjen e injektimeve, mungesa e lekut është kthyer në vlera mbi mesataren e vitit 2022 dhe është stabilizuar në fund të periudhës rreth nivelit 56 miliardë lekë, kundrejt 36 miliardë lekë në fillim të tremujorit të dytë.
