Rritja e çmimit të referencave për Tiranën është kundërshtuar nga komuniteti i biznesit, teksa Shoqata e Ndërtuesve ka thënë se kjo do të sjellë rritje të çmimit për qytetarët.
I ftuar në “A2 Business” nga Aurora Sulçe, për të folur për këtë çështje ishte Ilir Hebovija, Drejtor Ekzekutiv i Shoqatës së Ndërtuesve, i cili dha argumentet e tij se përse kundërshtohet ky vendim dhe pasojat që ai pritet të sjellë në xhepat e qytetarëve.
Pse kundërshtoni rritjen e çmimeve të referencave për kryeqytetin?
“Në kundërshtojmë mënyrën se si mungesa e thellë e transparencës se si janë marrë këto vendime për rritjen e çmimeve të referencës. Duhet të themi që është bërë një takim i parë prezantues. Në korrik të këtij viti dolëm përballë një VKM-je ku gjithçka kishte marrë fund dhe ishte vendosur. Pra, që ai takim ishte thjesht një takim mashtrues.
Përllogaritja e tyre është një formulë e gjerë që nuk mund të merret vetëm nga Ministria e Financave apo sektori imobiliar. Rritja dyfish në disa vende, ose mbi 35 për qind në disa vende të tjera ka rritur në mënyrë të ndjeshme kostot e ndërtimit.
Sa pritet të rriten çmimet për qytetarët?
Ne kemi bërë një përllogaritje fillestare që është 150-300 euro për metër katror rritje e menjëhershme për shkak të këtij efekti, pastaj duhet bërë llogaritja edhe për taksat e tjera, që lindin zinxhir nga ndryshimi i referencave për qytetin e Tiranës.
Pse po bëhet ky ndryshim i referencave?
Kërkesa në rritje e vazhdueshme për ndërtime në Tiranë. Duke qenë se kryeqyteti akoma nuk është ngopur nga ndërtimet dhe Bashkia e Tiranës ka një “lumë” kërkesash për leje të reja, kështu që është shumë komode për të marrë kollaj nga ndërtuesit që nuk ikin, ndërtojnë aty dhe rrinë aty.“, thotë Hebovija për A2 Business.
