LIGJET E BIZNESIT
Eksportuesit shqiptarë po kalojnë ditë të vështira. Zhvlerësimi i euros dhe rritja e kostove kanë bërë që eksportet të vijojnë rënien për të pestin muaj radhazi edhe në korrik, ndonëse ritmet e rënies janë ngadalësuar ndjeshëm në krahasim me muajt e mëparshëm.
Sipas Institutit të Statistikave, në korrik të këtij viti eksportet e mallrave arritën vlerën 38 miliardë lekë, duke u ulur me -4,0 %, në krahasim me të njëjtën periudhë të një viti më parë dhe me -0,6 %, në krahasim me qershorin 2023.
Të dhënat e detajuara tregojnë se rënia e eksporteve është ndikuar nga grupet: “Materiale ndërtimi dhe metale” me -8,7 për qind; “Tekstile dhe këpucë” me -1,8 për qind “Prodhime druri dhe letre” me -1,1 për qind etj. Ndërsa pozitivisht kanë ndikuar grupet: “Minerale, lëndë djegëse, energji elektrike” me +6,9 pikë përqindje dhe “Ushqime, pije, duhan” me +2,0 pikë përqindje.
Ndërsa si periudhë 7-mujore, eksportet e mallrave arritën vlerën 272 miliardë lekë, duke u ulur me -7,0 % kundrejt të njëjtës periudhë të një viti më parë.
