Inflacioni ka pësuar rënie në korrik, ndonëse çmimet e ushqimeve mbeten të shtrenjta. Instituti i Statistikave njofton se muajin e kaluar treguesi që mat koston e jetesës në vend, zbriti në 4.2%, niveli më i ulët nga marsi 2022, kur nisi rritja e çmimeve, si pasojë e luftës në Ukrainë. Ndërkohë që në korrikun e vitit të kaluar, inflacioni ishte 7.5%.
Pavarësisht rënies së inflacionit, ushqimet, që zënë peshën kryesore të buxhetit të familjeve shqiptare kanë vijuar të shtrenjtohen. Ushqimet janë 9% më të shtrenjta se korriku i kaluar, të ndikuara nga zarzavatet e patatet, që kushtojnë 21.6% më shumë, si dhe qumështi e vezët, me 13.6%.. Fluksi i lartë i turistëve duket se ka ndikuar edhe në shtrenjtimin e argëtimit, me çmimet 9.5% më të larta.
Krahasuar me korrikun e një viti më parë, rritja më e madhe e çmimeve vërehet në grupin “Argëtim dhe kulturë” me 9,5 %, pasuar nga grupet “Ushqime dhe pije joalkoolike” me 9,0 %, “Mobilje, pajisje shtëpie dhe mirëmbajtje e shtëpisë” me 6,0 %, “Hotele, kafene dhe restorante” me 5,0 %, “Veshje dhe këpucë” me 4,3 %, “Pije alkoolike dhe duhan” me 3,8 %, “Mallra dhe shërbime të ndryshme” me 3,7 %, “Shërbimi arsimor” me 2,0 %, “Qira, ujë, lëndë djegëse dhe energji” me 1,3 %, “Komunikimi” me 1,2 % dhe “Shëndeti” me 1,1 %. Nga ana tjetër çmimet e grupit “Transporti” shënuan ulje me 12,4 %.
Sipas parashikimeve të Bankës së Shqipërisë, inflacioni pritet të kthehet brenda objektivit 3% vitin e ardhshëm.
