Shqiptarët përfituan në vitin 2022 numrin më të madh të leje qëndrimeve në Europë

Qytetarët shqiptarë përfituan gjatë vitit 2022 numrin më të madh të leje qëndrimeve, në dhjetë vitet e fundit, në vendet e Bashkimit Europian.

Sipas raportit të Agencisë Europiane të Statistikave, EUROSTAT, publikuar të premten, 73858 leje qëndrimi u dhanë për shqiptarët nga vendet e Bashkimit Europian në vitin 2022.

Sipas EUROSTAT ky numër i leje qëndrimeve është dukshëm më i lartë se vitet e tjera ku gjatë vitit 2021 ishin dhënë 55085 leje qëndrimi për shtetasit shqiptarë dhe në vitin 2020 ishin dhënë 38240 leje qëndrimi.

Sipas statistikave europiane rreth 537 mijë shtetas shqiptarë kanë përfituar leje qëndrimi në vendet e Bashkimit Europian në dhjetë vitet e fundit (2012-2022).

Kjo prirje e lartë e shqiptarëve për të emigruar dhe punuar jashtë vendit ka sjellë në tregun shqiptar mungesë të fuqisë punëtore në shumë zona.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Italia kryeson ndër vendet që lëshuan më shumë leje qëndrimi për shtetasit shqiptarë me 34864 leje të lëshuara dhe më pas vijon Greqia me 14313 leje qëndrimi, ndërsa një prirje e re me rritje të dukshme është Gjermania ku gjatë vitit 2022 u pajisën me leje qëndrimi 13334 shtetas shqiptarë nga 4492 që ishin pajisur përgjatë vitit 2021.

Pas këtyre vendeve për numrin e leje qëndrimeve të lëshuara për shtetasit shqiptarë renditet Franca me 2455 leje qëndrimi dhe Malta që shënon një prirje të re të shqiptarëve për t’u punësuar me 2009 leje qëndrimi për vitin 2022 nga 1142 që kishte në vitin 2021.

Numri më i madh i leje qëndrimeve të lëshuara si për shtetasit shqiptarë edhe të huajt e tjerë sipas statistikave europiane lidhet me punësimin.

Ndërsa vendet e Bashkimit Europian lëshuan në vitin 2022 rreth 3.7 milionë leje qëndrimi për shtetasit jashtë vendeve të Bashkimit Europian, me një rritje prej 26% krahasuar me vitin 2021, rreth 1.6 milionë leje qëndrimi ishin dhënë për punësim”./ Zëri i Amerikës