LIGJET E BIZNESIT
Edhe pse Bordi i Transparencës është shkrirë dhe tregu është në dorë të operatorëve, shqiptarët po paguajnë më shtrenjtë për karburantet. Brenda pak ditësh, çmimet e naftës dhe benzinës janë rritur me rreth 8-9 lekë për litër.
Në pikat e tregtimit të Kastrati, operatori më i madh i pakicës dhe shumicës në vend, një litër naftë tregtohet me 185 lekë, nga 179 lekë që ishte rritur pak ditë më parë, ndërsa më herët çmimi kishte zbritur në 176 lekë.
Në pikat e tregtimit të Eida Petrolum, nafta shitet me 184 lekë.
Me ritme të shpejta është shtrenjtuar dhe benzina. Një litër tashmë tregtohet me 188 lekë, nga 182 që ishte më parë, ndërsa para se të fillonte shtrenjtimi, kishte zbritur në 179 lekë.
Operatorët e tregut pohojnë se rritja ishte e detyruar për shkak të shtrenjtimit të naftës në bursat ndërkombëtare, ku treguesi Platts, që është referenca të cilën e përdorin importuesit, ka arritur në rreth 900 dollarë për ton.
Pas shkrirjes së Bordit të Transparencës më 7 qershor të këtij viti, çmimet e karburanteve kanë ndryshuar dy herë dhe gjithmonë kanë qenë në rritje.
