LIGJET E BIZNESIT
Ndërsa vendi përballet me emigracion masiv dhe boshllëqe të forta në tregun e punës, Shqipëria renditet ndër shtetet ku të drejtat e punëtorëve shkelen vazhdimisht.
Kjo ka rezultuar në Indeksin Global t të Drejtave të Punonjësve 2023. Ky raport përshkruan vendet më të këqija në botë për punonjësit, duke vlerësuar vendet në një shkallë nga 1 në 5+ për shkallën e respektimit të së drejtave të tyre.
Sipas këtij indeksi, Shqipëria gjendet në grupshtetet me shkelje të vazhdueshme të të drejtave të punonjësve. Raporti citon, se politikat e një vendi kanë rendësi të madhe për të lehtësuar mjedisin e punës për punonjësit. Një mjedis i punës i favorshëm dhe mbështetës është thelbësor për prodhimtarinë, mirëqenien dhe përmirësimin e performancës së punonjësve.
Në një vështrim rajonal, edhe Mali i Zi dhe Bosnja e Hercegovina gjenden në një grupshtetesh me ne, sa i përket shkeljes së vazhdueshme të të drejtave të punonjësve. Ndërsa një panoramë më negative duket të jetë për Serbinë e Maqedoninë e Veriut, të cilët renditen në grupshtetet me shkelje sistematike të të drejtave të punonjësve.
Ndërsa punonjësit u detyruan të kërkonin paga më të mira nga kriza më e keqe e kostos së jetesës në dekada, 9 nga 10 vende shkelën të drejtën e tyre për grevë, citon raporti. Teksa kërkuan struktura përfaqësuese për t’ia paraqitur ankesat e tyre punëdhënësve, 8 nga 10 vende shkelën të drejtën e tyre për negociata kolektive.
Me gati gjysmën e vendeve të anketuara që shkelin të drejtën për liritë civile, themelet dhe shtyllat e demokracisë janë nën sulm. Lidhja midis mbrojtjes së të drejtave të punëtorëve dhe fuqisë së një demokracie nuk mund të nënvlerësohet. Erozioni i njërës përbën degradimin e tjetrit.
