Rritja e normës bazë të interesit nga Banka e Shqipërisë më 23 mars nuk është reflektuar me shtrenjtim të interesave të bonove të thesarit, ashtu siç pritej të ndodhte. Madje, ato kanë shënuar një rënie të lehtë.
Në përfundim të ankandit të kësaj jave për bonot 12-mujore, yield-i mesatar i ponderuar zbriti në 3.91%, nga 3.93% që kishte qenë në ankandin e mëparshëm. Sipas ekspertëve të sistemit financiar, arsyeja kryesore mund të jetë likuiditeti i lartë në treg dhe kërkesa e madhe e investitorëve për këto instrumente. Përballë një kërkese të lartë dhe ofertë tëlimituar, interesi ka pësuar rënie.
Në ankandin e ditës së martë, shuma e shpallur për financim nga Ministria e Financave dhe Ekonomisë ishte 5 miliardë lekë, ndërsa vlera totale e kërkesave të paraqitura në ankand arriti në 9.5 miliardë lekë. Pro rata apo pjesa e pranuar e këkesave konkurruese ishte përsëri shumë e ulët, 14.93%.
Qëndrueshmëria e yield-eve të bonove 12-mujore duket se për momentin po e frenon përcjelljen në tregun financiar të rritjes së fundit të normës bazë të interesit. Bonot 12-mujore janë instrumenti kryesor referues që përdoret për kuotimin e kredive me interes të ndryshueshëm të sektorit bankar.
