LIGJET E BIZNESIT
Pavarësisht thirrjes së kryeministrit që qytetarët të investojnë në letrat me vlerë të qeverisë, në bono thesari dhe obligacione, ato nuk po rezultojnë një alternativë shumë e leverdisshme investimi. Sipas të dhënave të bankës së Shqipërisë, interesat e obligacioneve 2-vjeçare të qeverisë shqiptare pësuan një rënie të ndjeshme në ankandin e parë të këtij viti.
Yield-i mesatar i këtyre instrumenteve zbriti në 5.8%, nga 6.24% që kishte qenë në ankandin e mëparshëm, që ishte zhvilluar në fillim të dhjetorit. Madje, yield-i dhe kuponi i obligacioneve rezultuan edhe më të ulëta se kuponi indikativ prej 6% i përcaktuar nga Ministria e Financave para ankandit.
Nga katër miliardë lekë që ishte shuma e shpallur për financim, vlera totale e kërkesave në ankand arriti në pothuajse gjashtë miliardë lekë, në vijim të tendencës rritëse të pjesëmarrjes së investitorëve në ankandet e bonove dhe obligacioneve të qeverisë shqiptare. Edhe yield-et e Bonove 12-mujore në ankandin e parë të këtij viti zbritën në 5.34%, nga një nivel maksimal prej 5.83% që kishin prekur në muajin nëntor.
Rënia e yield-it të Obligacioneve dyvjeçare konfirmon një tendencë të korrektimit të yield-eve të instrumenteve të borxhit qeveritar, pas një rritjeje shumë të fortë të tyre, veçanërisht në periudhën gusht-nëntor.
Faktori përcaktues ishte rritja e shpejtë e normave të interesit nga Banka e Shqipërisë. Norma bazë u rrit tre herë radhazi me nga 0.5 pikë përqindje mes gushtit dhe nëntorit. Kjo rritje e shpejtë krijoi pasiguri të ndjeshme në tregun financiar, të shoqëruar me ulje të pjesëmarrjes në ankandet e titujve qeveritarë dhe rritje të yield-eve të kërkuara për të financuar borxhin e qeverisë. Nëse norma bazë në këtë periudhë u rrit me 1.5 pikë përqindje, yield-i mesatar i Bonove 12-mujore u rrit pothuajse dy herë më shumë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
