Qeveria jep 320 milionë lekë për financimin e sportit

320 milionë lekë të reja të akorduara për financimin e sportit. Ky është vendimi i Këshillit të Ministrave, i botuar në fletoren zyrtare, me shifrën që e përkthyer në valutë shkon në më tepër se 2.7 milionë euro.

Pjesa më e madhe e fondit do të shkojë për Komitetin Olimpik Shqiptar, në kuadër të projektit për ekipet sportive në shkolla. Financimi për lëvizjen olimpike është në masën 250 milionë lekë, e thënë ndryshe 2 125 000 euro.

Projekti i KOKSH nisi zyrtarisht më 10 dhjetorin e kaluar, me eventin madhështor në Arenën Kombëtare. Aty u përfshinë 10 000nxënës, 22 000 pjesëmarrës, 700 skuadra dhe 350 trajnerë nga 61 bashki të vendit.

70 milionë lekë të reja, ose rreth 600 mijë euro nga buxheti i shtetit u akorduan për Federatën e Futbollit. Në vendimin e Këshillit të Ministrave, ky zë është etiketuar si fond për mbështetjen e ekipit kombëtar.

Në fundin e vitit 2022, kur vijonin negociatat për trajnerin e ri të kuqezinjve, përflitej se ky financim do të shërbente pikërisht për drejtuesin e stolit. Fondi u zyrtarizua pas takimit që kryeministri Rama zhvilloi me teknikun Sylvinho dhe asistentët e tij, Zabaleta e Guidoni. Për koincidencë, trajneri dhe ndihmësit do të paguhen pikërisht 600 mijë euro për kontratën 18-mujore në krye të Shqipërisë.