“Pakoja e Madhe”, siç i është referuar kryeministri paketës së re të mbështetjes financiare për të zbutur efektet e rritjes së çmimeve ishte temë debati në studion e “A2 Business” mbrëmjen e së premtes.
Për ekspertët e ftuar në studio, paketa 7.8 miliardë lekësh është një nisme pozitive dhe e nevojshme, por megjithatë e pamjaftueshme.
Adrian Civici, ekspert për ekonominë u shpreh se në raport me ç’kemi parë deri më sot, paketa e ndihmës mund të konsiderohet e madhe. Po ashtu, ai u shpreh optimist se mund të mos jetë e vetmja.
“Nuk mendoj se kjo është ndarja përfundimtare. Në raport me ç’ka ndodhur deri më tani në periudhën e ndërrimit të viteve rezulton si paketa më e madhe. Është paketë e madhe për kushtet tona. Mendoj që nuk do të jetë e vetmja. Si masë duhet vlerësuar. Mesazhi, është pozitiv”, deklaroi ai.
Kurse, për Arlinda Mujën, e cila është kryetare e Shoqatës së Mikrofinancës çdo ndihmë për qytetarët është e mirëpritur, por ajo theksoi se është për një lloj tjetër skeme ndihme. Sipas Mujës, më efektive do të ishte një ndihmë afatgjatë indirekte që do t’u krijonte bizneseve mundësinë që ta ndihmonin veten.
Por, për Zana Guxhollin, eksperte për ekonominë paketa në fakt është “mjerane” dhe fakti që do të ndahet pas Vitit të Ri, tregon sipas saj se do të përdoren për qëllimet elektorale.
Zonja Guxholli kujtoi se çmimet janë rritur me 25 për qind, dhe ndikimi që kjo paketë do të ketë në xhepin e qytetarit nuk është domethënës. Qëndrimi i Guxhollit nuk u mbështet nga Adrian Civici, i cili theksoi se ekonomia dhe financat tona kaq fuqi kanë.
