Shqipëria po humb tregjet maqedonase. Nga viti në vit, sasia e produkteve vendase të eksportuara drejt fqinjit lindor po tkurret.
Të dhënat nga Instituti i Statistikave tregojnë se nga mbi 500 mijë tonë mallra të shitura në Maqedoninë e Veriut në 2017-n në harkun e muajve janar-shtator, sasia ra në 425 mijë tonë në po të njëjtin hark kohor të 2021-shit e pak më shumë se 420 mijë tonë këtë vit.
Ndonëse në shifra “anemike” e kundërta po ndodh në kahun tjetër. Nga vit në vit, produktet maqedonase po bëhen përherë e më të pranishme në Shqipëri. Të dhënat e INSTAT tregojnë se nga rreth 141 mijë tonë mallra të importuara nga Maqedonia e Veriut në harkun e muajve janar-shtator 2017, sasia është rritur në gati 170 mijë tonë sivjet.
Kjo ka bërë që edhe bilanci tregtar mes dy vendeve të ngushtohet. Nga më shumë se 376 mijë tonë në favor të Shqipërisë, raporti mes eksporteve dhe importeve ka arritur në 9-mujorin e këtij viti në pak më shumë se 250 mijë tonë duke u rrudhur kështu me mbi 126 mijë tonë.
Për shkak edhe të pozicionit gjeografik e zhvillimit ekonomik të përafërt, Shqipëria dhe Maqedonia e Veriut shesin e blejnë nga njëra-tjetra të njëjtat mallra. Në krye të piramidës së shkëmbimeve tregtare mes dy vendeve renditen mineralet e lëndët djegëse, duke u ndjekur nga materialet e nderimit, ushqimet e pijet, produktet kimike e plastike e ato nga druri.
Pavarësisht dhjetëra marrëveshjeve të firmosura në kuadër të Ballkanit të hapur apo drejtpërdrejtë mes qeverive të dy shteteve, Shqipëria dhe Maqedonia e Veriut po humbin-njëra tjetrën, të paktën në një drejtim, atë të shkëmbimeve tregtare.
